KHAWTHLIR

Thisen pe
KṬP, Bethlehem Vengthlang Branch chuan an din champha vawi 27-na lawm nan October 9, Inrinni khan Synod Hospital tan thisen unit 30 an pe a, petute mipa 25 leh hmeichhia panga an ni. ṬKP, Lunglei Zotlang North Unit pawhin Christian Hospital tan thisen unit 18 an pe a, petute mipa 11 leh hmeichhia pasarih an ni.

Chief Minister kawm
October 9, Inrinni khan chief minister Zoramthanga leh Chhattisgarh MLA pahnih Lakheswar Bhagel leh Prakash Nayak-te CMO-ah an inkawm a, an state dinhmun leh culture chungchang an sawiho. Chhattisgarh MLA-te chuan October thla tawp hian National Tribal Dance Festival buatsaih an tum thu leh he kutah hian state hrang hrang aṭangin leh ram pawn aṭangin participant an beisei thu Chief Minister an hrilh. Ni hnih cham tura lo zin Chhattisgarh MLA te hi Art & Culture department hotute nen vawiin hian an inkawm leh dawn a ni.

ZMC volunteer-te hlawh pe chhuak
ZMC director John Zohmingthanga chuan thuchhuah siamin, Covid-19 dona kawnga ZMC-a thawk (volunteer)-te hlawh (August leh September, 2021) tur Rs. 60,28,000 chu October 9, Inrinni khan sorkarin a pe chhuak (release) tih a tarlang. ZMC Director tarlan danin, volunteer hrang hrangte hlawh chu - staff nurse Rs. 22,000, IV grade Rs. 8000, lab technician Rs. 15,000 leh DEO Rs. 15,000 a ni.

Presbytery tiak
October 8 aṭanga neih ṭan Mizoram Synod hnuaia inkhawmpui lian ber dawttu, Presbytery Inkhawmpui chu nimin khan a ṭiak. Hripui leng avangin Presbytery inkhawmpui hman dan a inang lo a, Zirtawpni aṭanga rorel ṭan an awm laiin, Inrinnia rorel ṭan chauh pawh an awm a, an thurel hrang hrangte hi Synod-ah thlen a ni ang. Presbytery inkhawmpuiah hian kohhran upa enge mawzat nemngheh an ni. Mizoram Synod hnuaiah hian Presbytery 41 a awm a, chung zinga 40 chu Mizoram chhunga mi a ni.