Sakei humhalh a ṭulzia inzirtirna khar

October 9, Inrinni khan Aizawl Zoological Park-ah India rama sakei humhalh a ṭulzia inzirtir tharna ‘India for Tigers - A Rally on Wheels’ kharna hun hman a ni a, Environment, Forest & Climate Change minister TJ Lalnuntluanga'n a hman pui a; Aizawl Zoological Park chanchin tawi tarlanna (pamphlet) a tlangzarh nghal.

India Independence kum 75-na denchhena Azadi Ka Amrit Mahotsav kalpui mek leh National Wildlife Week hman mek denchhenin National Tiger Conservation Authority (NTCA) chuan ‘India for Tigers - A Rally on Wheels’ tih hi a duang chhuak a ni. He rally hi India rama sakei humhalhna (tiger sanctuary) zawng zawngin ni sarih chhung hman tur a ni a, state hrang hrang 18 huapin km. 7500 zet cover tura ruahman a ni.

Mizoramah pawh Dampa Tiger Reserve aṭanga bul ṭanin Kaziranga kaltlanga Manas Tiger Reserve a tawp tura duan a ni. Amaherawhchu, Covid-19 avangin Mizoram chhung chinah Dampa Tiger Reserve aṭanga Aizawl Zoological Park thleng tura thlak a ni.