Ni hnih chhungin hripui vei Mi 2,120 hmuh belh a ni
October 8, Zirtawpni khan Mizoramah Covid-19 vei mi 950 hmuh chhuah niin, October 9, Inrinni khan mi 1,170 hmuh belh leh a ni a, ni hnih chhungin mi 2,120 hmuh belh a ni. Inrinni khan hripui vei dam tawh mi 1,256 leh nimin khan mi 965 chhuahtir an ni a, Inrinniah mi pali leh niminah mi paruk an thi.
Inrinni leh nimin khan hripui vei dam tawh mi 1,256 chhuahtir an ni a, Inrinniah mi pali leh niminah mi panga an thi.
Covid-19 vei October 8-a hmuhte chu ZMC laboratory-a hmuh chhuah 273, TrueNAT hmanga hmuh 72, RAT hmanga hmuh 576 leh Fluorescent Immunoassay (FIA) hmanga hmuh 29 an ni.
October 9-a hmuhte chu ZMC-a hmuh 451, TrueNAT hmanga hmuh 70, RAT hmanga hmuh 619 leh FIA hmanga hmuh 30 an ni. Ni hnih chhunga hmuh tharte hi mipa 969 leh hmeichhia 1,151 an ni.
IDSP record angin, Mizoramah Covid-19 vei 1,05,829 hmuh chhuah a ni tawh a, mipa 51,918 leh hmeichhia 53,911 an ni. Nimin tlai dar 5 thleng khan mi 90,812 (85.81%) chhuahtir an ni tawh a, mi 354 (0.33%) thi tawhin, enkawl mek mi 14,663 (13.85%) an awm.
October 8, Zirtawpnia Covid-19 vei hmuh thar mi 950-te chu symptom nei 448 leh nei lo 502 an ni a; October 9, Inrinnia Covid-19 vei hmuh thar mi 1,170-te chu symptom nei 496 leh nei lo 701 an ni.
Kum 2011 chhiarpui aṭanga chhûtin Mizorama Covid-19 vei hmuh tawh 1,05,829 chu mi 1,000 zelah hripui vei mi 96 an awm ang a ni a; mi 1,00,000 zela Covid-19 vangin mi 31 an thi tawh ang a ni.
Nimin khan tlai dar 5 thlengin hripui vei dam tawh mi 965 chhuahtir an ni a; Aizawl district-ah mi 803, Mamit district-ah mi 60, Lawngtlai district-ah mi 35, Champhai district-ah mi 32, Lunglei district-ah mi 23 leh Hnahthial district-ah mi 12 an chhuak.
Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 1,01,296 chu Mizoram chhunga kái chhâwng an ni a, mi 4,533 chu Mizoram páwn aṭanga an rawn luh hnua hmuh chhuah an ni.
