NE state pasariha hri vei hmuh chhuah aiin Mizorama hri vei hmuh chhuah a tam zawk

October 9, Inrinni khan hmar­chhak state zingah Mizorama hri vei hmuh chhuah a tam ber a; hmarchhak state pariata hmuh chhuah 1,755 aṭanga 66.66% chu Mizorama hmuh chhuah a ni.

Inrinni khan hmarchhak state dang - Assam (273), Mani­pur (147), Meghalaya (81), Arunachal Pradesh (16), Sikkim (18), Nagaland (31) leh Tripura (19)-a hri vei hmuh chhuah thar belhkhawm chu 585 a ni a, Mizo­rama hri vei hmuh chhuah thar chu 1,170 a ni thung.

Hmarchhak state pariat zinga hri vei hmuh chhuah tawh zat tam lamah Mizoram chu pathumna a ni mek a; hmarchhak state-a hri vei mi nuai khat hmuh tlin tawhna state pathum zingah leh India ram puma hri vei mi nuai khat hmuh tawhna state 26 zingah a tel bawk.

Mizorama hri vei hmuh chhuah tawh aṭanga enkawl mek percentage chu a tlahniam hret a, chutih rualin India rama hri vei hmuh chhuah aṭanga enkawl lai tamna ber state ala ni chhunzawm zel.

Nimin zinga sorkar laipui report angin Mizoramah hri vei hmuh chhuah tawh aṭanga 14.77% chu enkawl mek an ni a, Mizoram hnaih ber tu chu Kerala state niin enkawl lai 2.38% chauh an nei.

Hri vei hmuh chhuah tawh aṭanga thihpui percentage-ah chuan Mizoram chu India rama a hniam ber dawttu a ni thung a, hri vei hmuh chhuah tawh zawng zawng 1,05,829 aṭanga 347 (0.33%) an thi tawh.

India ramah hri vei hmuh chhuah tawh aṭanga thihpui percentage sang ber chu Punjab state a ni a, hri vei 6,01,849 hmuh chhuah tawh aṭanga 16,529 (2.75%) an thi tawh.