Zirtirtu ṭha chawimawina dawng zingah Aizawl aiin thingtlanga zirtirtu an tam zawk

School Education de­part­ment-in zirtirtu ṭha chawimawina a buaipui National Award dawng thei mi 76 an awm tawh a, State Award dawng thei mi 53 awmin, heng zinga mi 23 chuan chawimawina an dawng kawp. State leh National Award dawngte zingah Aizawl khawpui chhunga zirtirtu aiin Aizawl pawna zirtirtu an tam zawk.

Vanglaini palai zawhna chhangin School Education director James Lalrinchhana chuan zirtirtu ṭha thlang turin tehfung hrang hrang a awm thu sawiin, "Award dawng tur hian committee chi hrang hrang din a ni a, tlawmngai pawl aiawhte pawh member an ni. Heng committee-te hi paltlang vek a ngai a ni. Zirtir hna kum 15 tal thawk tawh nih a ngai," a ti.

James Lalrinchhana sawi danin, National Award dawng turin kum 1965 aṭangin zirtirtu pangngai mi 11 thlan an ni tawh a, mi 65 chu headmaster leh principal niin, an vaiin 76 an ni. Mi 76 zinga mi 28 chu mitthi tawh an ni a, mi 48 chu la dam lai an ni a, zirtirtu 11 chu tuna la thawk lai mek an ni. Zirtirtu 76 zingah hian 29 chu Aizawl niin, 47 chu Aizawl pawna zirtirtute an ni.

State Awards to Meritorious and Outstanding Teachers dawng tur chu kum 1997-ah thlan hmasak ber a ni a, kum 2021 thleng hian mi 53 in an dawng tawh. Heng zingah hian zirtirtu pangngai pariat an awm a, headmaster/principal 45 an awm thung.

Mi 53 zinga mi 7 chu mitthi tawh an ni a, mi 16 chu la thawk mek niin, mi 30 chu chawl tawh an ni thung. State Award dawngtu mi 53 zingah Aizawla zirtirtu 19 awmin, 34 chu Aizawl pawna zirtirtu an ni.

Zirtirtu ṭha chawimawina National Award leh State Award dawng hmasa berte chu pafa an ni. National Award to Teachers dawng hmasa ber chu Selchhunga, head teacher (Rtd) niin, Saitual Primary School a thawk a ni a, kum 1965 ah a dawng a, a boral tawh.

State Award to Meritorious and Outstanding Teachers dawng hmasa ber chu V Ralliana niin, kum 1997 ah a dawng a, Govt Mizo HSS-a principal niin, a thi tawh.