Mipuite mask vuah reng turin ngen ; Covid-19 donaah kan pawimawih ṭheuh - Health Minister
Nimin khan Health minister Dr R Lalthangliana chuan ZMC central library-ah ni 10 chhung (October 11-20, 2021) awh tur, Mizoram puma hmaituamna vuah reng tura hmalakna runpui 'All Mask Campaign' a hawng. Health Minister chuan Covid-19 do kawngah mitin kan pawimawh ṭheuh thu a sawi.
Health Minister chuan Mizoramah Covid-19 kai kan pung chakin nunna chan pawh kan pung chak hle tih sawiin, "India hmarchhak state pasarihte active case (positive mek) belhkhawm aiin Mizorama Covid-19 active case a tam zawk. Kan dinhmun thlira rawtna siam turin sorkar chuan State-Level Expert Team on Covid-19 Management a din a, anni'n rawtna hrang hrang an siam zingah mipuite hnena mask vuah uar tura inzirtir a tel a, chumi bawhzui chuan ni 10 chhung uar taka hmalakna kalpui turin chet kan la ta a ni," a ti.
Zirchianna hrang hrangah a lan tawh bakah a takin mask vuah hian min lo veng hle a ni tih kan hre tawh tih sawiin Dr R Lalthangliana chuan, "Mask vuah ṭhat pawimawhzia hi chu kan hre vek tawhin a rinawm a, kan zawm ṭha hlei thei lo nia a lan avangin tuna campaign kan neih tur hian awmzia a neih ngei ka beisei a ni. Kan himna tur, hri kai enkawl ngai nih kan pumpelhna tur pawimawh ber pakhat a ni tih hriat a ngai," a ti a, hmaituamna tur kan remchan dan ang angin siam chawp theih a nih thu a sawi.
Health Minister chuan ICU leh Covid-19 kaite enkawlna hmun hrang hrang a khat hneh hle tih sawiin, "Mimal tin kan fimkhur a ngai a, chhungkuaah kum upa leh natna khirh vei kan nei a nih phei chuan kan fimkhurpui hle a ngai a, an sahimna hi kan mawhphurhna a ni tih kan hriat ṭul. Hripui leng a reh hma hi chuan a ṭul tawpah lo chuan inlen pawh lo ang u. Sorkar chakna leh sum leh pai hmanga do hneh chi a ni lo a, kan zavaiin kan pawimawh ṭheuh tih kan hriat reng a ṭul a ni," a ti.
State Level Expert Committee on Covid Management-in All Mask Campaign neih an rawt chhan hi an tarlan dan chuan, Mizoramah Covid-19 a pung zel rih a, hei hi a chhan ber chu mipuiten Covid Appropriate Behaviour (CAB) kan zawm ṭhat tawk loh vang a ni. A bik takin in chhungah Covid-19 virus hi a darh ber tih hriat a ni a, chu chuan in chhungah mask kan vuah ṭha lo tih a tilang.
Covid-19 positive-te hi a tam ber chu ni 10 chhungin an dam tih hriat a ni. Hripui kaite an dam theih hun chhung ni 10 tal hian Mizoram chhunga mipui zawng zawngten mask ṭha taka kan vuah chuan kan case pung mek leh kan inkai darh nasa lutuk hi nasa takin a tlem a beiseiawm.
In chhunga mask hman hi a ṭha tih a lan chianna em em chu Covid-19 kai enkawltute leh doctor leh nurse hripui kai an awm mang lo hi a ni. Mask vuah ṭhatna hi scientific evidence pawh awmin, khawvel ram dangah pawh kai lo tura invenna pawimawh ber pawla ngaih a ni.