ZMC-a thawk tur staff nurse lak danah MSU leh sorkarin inremna an siam

MSU chuan ZMC-a thawk tur staff nurse 50 lak danah thil fel lo awm nia an hriat avangin nurse lak thar joining report pe turte leh ZMC administrative staff-te pisa kal tur an dang a, sorkar nena inremna an siam hnuah an ṭin darh. Hetihlai hian Health minister Dr R Lal­thangliana chuan tihsual palhah hriatthiam a dil.

MSU hian staff nurse 50 lak danah hian thil fel lo a awm nia an hriat avangin October 6, 2021 khan result tihchhuah tawh cancel turin Chief Minister an ngen. MSU chuan nurse lakna-ah hian interview kal tlang loa lak an awm avang leh mahni nunna thapa inpe volunteer-te duhsakna a awm lo chu an hrethiam thei lo a ni.

Pathianni zan khan MSU chuan hnatlang kohna tichhuakin, Mizo zirlai zawng zawng leh dik lo leh induhsakna hleihluak taka hna lak siamṭhat duhtu mipuite October 11 zing dar 9-a ZMC, Falkawn-a kal turin an ngen a ni.

Dr R Lalthangliana chuan emer­gency meeting neiin, nurse 50 lak belh an rawt tih sawiin, "Meeting zawh tukah advertisement kan tichhuak nghal a, rei pawh rial thei loin interview kan ti nghal rum rum lo thei lo a ni. Indo laia sipai lak ṭul ang deuh kha kan dinhmun a nih avangin formality pawh kan zawm hman lo," a ti.

ICU peih fel ruala nurse-te luhtir a ngaih tawh avangin written exam tihna hman pawh a awm lo tih sawiin Health Minister chuan, "Interview Board panga siamin board tinah hian DPAR, Nursing Council leh doctor aiawh mi pakhat theuh an awm a, ni li chhung interview neih a ni," a ti a, tihsual palh a awm a nih pawhin rikrum thil tak meuh meuha lak an ni tih hriatsak a, hrethiam turin a ngen.