Health Minister-in ICU ward a hawng

Nimin khan Health minister Dr R Lalthangliana chuan Zoram Medical College (ZMC) ah intensive care unit (ICU) ward thar, khum 10 awmna a hawng.

ICU hawn puala inkhawm buatsaihah Dr R Lalthangliana chuan Covid-19 thawhkhatna-ah khan Pathian venhimna leh kan ṭanrualna a zarah kan tuar na lo tih sawiin, "Tunah erawh kan dinhmun sawi ngai loin kan hre vek a, first wave laia kan fimkhur ang khan mimal tinin mahni hmun ṭheuhah ṭan kan lak thar ṭheuh a ṭul hle a ni," a ti.

Health Minister chuan Covid-19 thawhkhatna-ah ICU khum 12 a awm tih sawiin, "Thawhnihna atan theihtawpin kan inpuahchah a, khum 34 siambelhin 34 kan nei ta a ni," a ti a, nitin nunna chan leh damlo serious an pun tak zel avangin hmanhmawh takin ICU khum 10 dah belh turin ṭan an lak thu a sawi.

Dr R Lalthangliana chuan ICU-a thawk tur specialist doctor pathum lak sorkarin a phalsak leh thu sawiin, "ICU-a duty doctor-te an lo positive ve chang a awm hian a thlakna turah kan mangang khawp a, tunah chuan kan zia deuh a beiseiawm. Chief Minister zahawm takin hriatthiamna thui tak nen kawng hrang hrangin ruahmanna min siam sak ṭhin a ni," a ti.

Thusawitu dang, Aizawl South-III bialtu MLA Prof. F Lalnunmawia chuan, "ZMC hi kan bial chhunga awm ni mah se, Zoram pumin kan chhawr a, Covid-19 leng karah kan hmang ṭangkai hle," a ti a, ICU hawn thar a ni chu lawmawm a tih thu a sawi.

ZMC-a ICU ward thar hawn hi tuna ICU leh SICU ward hman lai mek chungah a awm a, ICU khum pakhat hian 250 sq. feet a awh a, LG Company in an pek AC dah vek niin, donning/doffing area pawh a awm. Oxygen plant aṭangin oxygen pipeline thlunzawm vek a nih bakah, Japan sorkarin Ministry of Health & Family Welfare kaltlanga a rawn pek Phillips ventilator ṭha chi vuah vek a ni.

ICU ward siamna atan hian Mizoram sorkar chuan cheng nuai 39 a seng a ni.