Lawngtlaiah World Mental Health Day 2021

Lawngtlai District Mental Health Programme (DMHP) bultumin nimin khan District Hospital, Lawngtlaiah 'World Mental Health Day 2021' hman a ni a, district medical superintendent Dr Zothanpari Chhakchhuak in a hmanpui.

World Mental Health Day hi October 10-ah hman ṭhin ni mah se kuminah Pathianni a nih avangin nimin khan hman a ni a, thupui atan 'Khawvel nunphung inchen lo takah rilru lam hriselna (Mental Health in an Unequal World)' tih hman a ni.

Dr Zothanpari Chhakchhuak chuan mithiamte zirchianna aṭangin mi pasarih kal khawm zinga pakhat zelin rilru lam harsatna an nei nia chhut a nih thu a sawi a,"Rilru lam harsatna neih chu thil zahthlak a ni lo a, natna dang ang bawka enkawl dam theih a ni. Nitin nunah rilru hriselna ngaih pawimawh a ṭul," a ti a, rilru hrisel nei tura taksa vawn uluk a ṭul thu leh harsatna nei nia hriatte chu mithiamte panpui vat a pawimawh thu a sawi.

Lawngtlai DMHP hi October, 2016 khan din ṭan a ni a, a din tirh aṭanga September, 2021 thleng khan damlo 2,467 an enkawl tawh a ni.