SMATEE result chhuak

Mizoram state quota-a professional course hrang hrang, JEE leh NEET-in a huam lohte zir tur thlanna, State Medical and Technical Entrance Examination (SMATEE), 2021 result tihchhuah tawh chu ennawn leh a nih hnuah tihchhuah a ni leh tawh.

Tarlan tawh angin SMATEE result hi Sept. 30, 2021 khan tihchhuah a ni a, October 4, 2021 khan Higher & Technical Education Director chuan result hi ennawn leh a nih thu a tarlang. HTE Director hian notice a tihchhuahah hian result ennawn a nih chhan a tarlang tel lo. Ennawn leh a nih hnu hian result hi tihchhuah leh a ni tawh.

Sorkarin answer key pawh kuminah a tihchhuah loh thu sawi­in zirlai nu leh pate chuan Vanglaini an hrilh a, "SMATEE exam hi tick tawp a nih avangin zirlaite'n answer key aṭangin an mark hmuhzat tur an chhut thei ṭhin a ni," an ti a, tute'n emaw answer key an siam erawh pali a awm thu an sawi.

Hetihlai hian result tihchhuah ṭhat leh a nih rual hian answer key pawh tihchhuah a ni.