Hunpuiah halpuah leh a kaihhnawih khap dawn

Chief secretary Lalnunmawia Chuaungo hoin Mizoram Police Headquarters-ah nimin khan sorkar leh tlawmngai pawl hruaitute an ṭhu khawm a; kumin Krismas, kumthar leh Puja (Dusshera, Diwali leh a dangte) lo thleng turah halpuah, halmawi, silailem mu nei chi leh sky lantern khap an rel.

Lalnunmawia Chuaungo chuan halpuah leh halmawiin boruak a tihchhiat avangin kutpui hun laiin âwmna, khuh leh chuap lam khawih natna a pung hluai ṭhin tih medical thiamna in a nemnghet tawh tih a sawi a," Covid-19 nasa taka a len mek lai a nih avangin mipui hrisel nan khawng leh zuala khapna kalpui a ṭul," a ti.

Nimin meeting hian kum kal taa khapna kalpui a nih dan a thlir let a - Krismas leh Kumthar bawra dan bawhchhia mi 22 case siamsak niin an zinga pasarih chu hrem (convict) an ni tawh a, court case kal lai mek 15 a la awm.

Ṭhukhawm chuan khapna thupek chu a rang thei ang bera tihchhuah ṭul an tih thu an sawi a; veng tina information mike te, print leh electronic media leh social media kal tlangin awareness campaign kalpui bakah, sumdawng, mimal leh chhungkaw tinte chu heng thilte hi chah lo tura ngen nise an ti.

Assam Rifles, BRTF, BSF leh sipai hmunah halpuah an hal lohna turin khapna order pek ni se an ti bawk a; Mizoram ramria check gate-a uluk lehzuala lirthei endik tur te, sumdawnna hmun leh kudam te a ṭul dan a zira endik leh police-te bakah tlawmngai pawlte'n hunpui laiin duty tur insiam leh se, an ti.

Dan anga khapna thupek tih­chhuah a nih veleh Aizawl Additional SP kaihhruaina hnuaia din Special Cell-te'n hma an la ṭan nghal dawn a; phal loh thil lo chah ru emaw, zuar emaw an awm a nih chuan dan angin hrem an ni dawn a ni.