KHAWTHLIR
Thisen pe
UPC ṭhalai, Pentecostal Youth Department, Lamṭhuamthum, Haulawngte chuan nimin khan an kohhran hall-ah Lunglei Civil Hospital tan thisen unit 60 an pe a, petute mipa 53 leh hmeichhia pasarih an ni. Hrangbana College zirlai pathum leh mi dang pangate'n Aizawl Civil Hospital-ah thisen an pe bawk.
Smartphone 46 sem
Lunglei DC Kulothugan A hmalakna-a EPIL CSR kaltlanga Rs. 3,00,000 an hmuh hmangin MSU regional hqrs., Lunglei chuan nimin khan BPL leh AAY chhungkua-a zirlai naupang 46 hnenah smartphone an sem.
DEO hoin ṭhukhawm
Kolasib DC conference hall-ah nimin khan district election officer (DEO) Dr H Lalthlangliana, bawrhsap kaihhruaiin Tuirial bial by-election neih tura model code of conduct (MCC) leh hri laka him inthlanna thianghlim leh felfai kalpui dan tur sawiho a ni a, Kolasib district Mizoram People’s Forum (MPF) hruaitu te, Tuirial bial by-election neih tura political party hrang hrang candidate leh an agent-te bakah sectoral magistrate-te an tel. DEO chuan an district-a hrikai zatin tlak hniam lam a pan zel thu sawiin inbuatsaihna ṭha leh thawhhona ṭha a awm chuan inthlan boruak karah pawh hri kai zat hian kiam lam a pan zel theih thu a sawi.
Naupiang thilpek hlan
International Girl Child Day pualin nimin khan Serchhip District Hospital-ah Beti Bachao Beti Padhao (BBBP) Project Management Unit district coordinator VL Remruatpuii leh Sarah Lalbiakliani te’n naupiang thar hmeichhiate hnenah nausen mamawh leh naupang lawm tur chi hrang hrang an hlan.
December 19, 2011 khan United Nations General Assembly chuan October 11 hi International Girl Child Day atan a lo puang tawh a, Serchhip District Beti Bachao Beti Padhao pawhin kumtin he ni hi a hmang ṭhin a ni.