ASF vangin vawk 29,085 a thi tawh

Vawk pùl hri, African Swine Fever (ASF) avangin nimin thleng khan Mizoramah vawk 29,085 a thi tawh a, khua/veng 270-ah ASF a léng tih finfiah a ni tawh. Nimin khan ASF hri kai vawk 70 a thi a, ASF lènna nia rinhlelh khua/veng pahnihah vawk panga a thi bawk.

Animal Husbandry & Veterinary department-in report an dawn chinah, nimin thleng khan ASF infected area-a vawk 10,175 suat a ni tawh a, ASF lênna nia rinhlelh khua/veng pasariha vawk 190 suat tawh nen avaia Mizorama vawk suat tawh chu 10,365 a ni. ASF vangin Mizoramah vawk 29,085 a thih tawh laiin, ASF lènnaahte vawk dam lai 47,669 a la awm a; nimin thleng khan ASF infected area-a puan ni lo khua/veng 94-ah chhan hriat loa vawk thi 513 a awm tawh.

Aizawl district chu ASF infected area leh ASF vanga vawk thi tamna ber a la ni zel a, Mizoram puma infected area 270 zinga 112 (41.48%) leh vawk thi zawng zawng 29,085 zinga 12,129 (41.70%) chu Aizawl district-a mi a ni. Serchhip district chu ASF vanga vawk suat tamna ber a ni a, Serchhip district-a ASF infected area 35 zinga 30-ah nimin thleng khan vawk 3,028 suat a ni tawh.

Serchhip district-a Thenzawl khua chu Mizorama ASF vanga vawk thi tamna ber khua a ni bawk a, nimin thleng khan Thenzawl khuaah vawk 921 a thi tawh. Mamit district-a Léngte khua chu ASF vanga vawk suat tamna ber khua a ni thung a, vawk 2,033 suat tawh niin, hei hi Mizoram puma vawk suat tawh zat 10,365 aṭangin 19.61% a tling.

Chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin AH&Vety department chuan mipui an ngen a ni.