Covid-19 vangin mi pali an thi

October 10, Pathianni tlai dar 5 aṭanga nimin tlai dar 5 thleng khan Mizoramah Covid-19 vangin mi pali an thi a, Mizorama hripui vanga thi chu 358 an tling tawh.

Nimin zinga sorkar laipuiin state hrang hrangte Covid-19 din­hmun a tarlan danin, Mizoram chu India rama hripui vei hmuh chhuah tawh aṭanga thihpui tlem lamah a tawp ber dawttu-na a ni a; hripui vei hmuh tawh 1,06,136 aṭanga 0.34% in an thihpui tawh. Mizoram aia hniam chu Dadra And Nagar Haveli And Daman And Diu a ni a, hripui vei hmuh tawh 10,672 aṭanga 0.04% in an thihpui tawh a ni.

Pathianni zan dar 8 khan Lalthanzama (71), Hmar Veng, Kawnpui chu Kolasib DCHC-ah a thi a, natna dang nei tel a ni. October 7 khan hri a kai tih hriat chhuah niin hemi ni vek hian DCHC-ah admit nghal a ni.

Lianzuala (71), Phulmawi chu Pathianni zan dar 11:05 khan an chenna inah a thi a, natna dang nei sa a ni. October 4 khan hri a kai tih hriat chhuah niin home isolation-in in lamah enkawl a ni.

Zakhumi (78), Sihphir chu nimin zing dar 2:10 khan ZMC-ah a thi a, natna dang nei a ni. October 8-ah hri a kai tih hriat chhuah niin hemi ni vek hian ZMC-ah dahluh a ni.

Nimin zing dar 6 khan Lalchhingi (74), Zemabawk chu ZMC-ah a thi. October 10 khan hri a kai tih hriat chhuah niin hemi ni vek hian ZMC-ah admit nghal a ni.