SMATEE-ah thil dik lo a awm - ZPM Ṭhalai

ZPM Ṭhalai chuan nimin khan thuchhuah siamin, State Medical and Technical Entrance Examination (SMATEE)-a thil fel lo a awm niin a tarlang a, a mawhphurtu hnena hremna pêk an phut.

ZPM Ṭhalai tarlan danin, Higher and Technical Education department-in ni 30.9.2021-a SMATEE result a tihchhuahah, thil felhlel lian tak awmin, zirlai mi 18-te chhanna lehkha (answer paper) chu boin, exam nawn hial ngai khawpin zirlaite an awm a ni.

SMATEE hi Mizoram sorkâr quota-a zirna sâng zawk beitute thlanna tur a nih avângin, zirlaite'n beisei an nei sâng êm êm a, rinna pawh an nghat ṭhin a ni.

Thil thlen dan chu zirlai rilru thianghlim, beiseina sâng tak neia intihsiâkna beitute tibeidawng theitu a nih thu tarlangin ZPM Ṭhalai chuan, "Fel lo taka thil titu zawng chhuâka, hremna pe ngei turin Mizoram sorkar kan phut a ni," an ti.