Covid-19 : Mizoram dinhmun ; Pathianni khan hri vei 307 hmuh belh

October 10, Pathianni khan Mizoramah swab sample 1,242 endik aṭangin Covid-19 vei mi 307 hmuh a ni a, hmarchhak state-a hripui vei hmuh chhuah tam berna a ni.

Pathianni tlai dar 5 aṭanga nimin tlai dar 5 thleng khan Covid-19 vangin Mizoramah mi pali an thi a, hripui vei dam tawh mi 885 chhuahtir an ni bawk.

Covid-19 vei October 10-a hmuhte chu TrueNAT hmanga hmuh pali leh RAT hmanga hmuh 303 a ni a; Fluorescent Immu­noassay (FIA) leh ZMC RT-PCR hmangin swab sample endik a awm lo.

IDSP record angin, Mizoramah Covid-19 vei 1,06,136 hmuh chhuah a ni tawh a, mipa 52,052 leh hmeichhia 54,084 an ni. Nimin tlai dar 5 thleng khan mi 92,370 (87.02%) chhuahtir an ni tawh a, mi 358 (0.33%) thi tawhin, enkawl mek mi 13,408 (12.63%) an awm.

Nimin zinga sorkar laipuiin India ram Covid-19 dinhmun a tarlan danin Mizoram chu hmarchhak state pariat zinga Pa­thiannia hripui vei hmuh chhhuah tam berna a ni leh a; Pathianni khan Assam-ah mi 160, Manipur-ah mi 150, Meghalaya-ah mi 59, Sikkim-ah mi 13, Arunachal Pradesh-ah mi 19, Nagaland-ah mi pariat leh Tripura-ah mi pali hmuh chhuah a ni.

Pathianni khan hmarchhak state pariatah hri vei thar mi 720 hmuh chhuah a ni a, heng zinga 307 (42.63%) chu Mizorama hmuh an ni. Hri vei hmuh chhuah aṭanga enkawl mek percentage-ah Mizoram chu India rama a sang ber a ni a, chutihrualin a tla hniam ve zel. October 10, Pathianni zinga sorkar laipui tarlan danin Mizoramah hri vei hmuh chhuah tawh aṭanga enkawl mek 14.77% an awm a, nimin zing report-ah chuan 13.47%-ah a tla hniam tawh. Mizoram hnaih bertu Kerala state-ah erawh hri vei hmuh chhuah tawh aṭanga enkawl mek percentage chu 2.33% a ni thung.

Nimin khan tlai dar 5 thlengin hripui laka fihlim tawh mi 885 chhuahtir an ni a; Aizawl district-ah mi 618, Siaha district-ah mi 96, Mamit district-ah mi 67, Lunglei district-ah mi 43, Lawngtlai district-ah mi 25, Champhai district-ah mi 17, Kolasib district-ah mi 10 leh Saitual district-ah mi pakua an chhuak.

Pathiannia hri vei hmuh 307 zinga 134 chu mipa leh 173 chu hmeichhia an ni a, an zinga mi 241 (78.50%) in symptoms an nei. Mizorama Covid-19 vei hmuh tawh 1,06,136 chu mi 1,000 zelah hripui vei mi 97 an awm ang a ni a; mi 1,00,000 zelah Covid-19 vangin mi 32 an thi tawh ang a ni bawk.