Home Minister-in lirtheia chetsual chhan Hriat theihna tur iRAD project a hawng

Lirtheia chetsualna a awma chetsualna thlen chhan hriat theihna tur, Integrated Road Accident Database(iRAD) Project chu nimin khan Home minister Lalchamliana'n Mizorama hman ṭan turin DGP conference hall-ah a hawng.

Home Minister chuan India ramah ram chhung hmasawnna tur leh khua leh tuite ṭhat zawkna tur project, programme leh scheme hrang hrang hman tura chhawpchhuah leh hman mekte sawiin, "Sorkarin project, scheme leh programme a neihte a hlawhtlinna tak tak chu a buaipuitu sorkar official-te kutah thui tak a innghat a ni," a ti.

Lalchamliana chuan iRAD project chu Ministry of Road Transport & Highways-in a kalpui a ni tih sawiin, "He hmalakna hi a pawimawh hle a, Mizoram kawngpui enkawltu PWD-te pawhin an chhawr ṭangkai dawn hle," a ti a, iRAD vangin kawngpuite pawh tun aiin lirtheia veivakte tan a him chho dawn tih a sawi.

iRAD project hman a ni ta chu lawmawm a tih thu sawiin Home Minister chuan, "Lirthei chetsualna thlen chhan tam zawk chu pumpelh theih leh a khalhtute fimkhur tawk loh avanga thleng a ni. Lirtheia chuangte nunna kawltu emaw tih turin lirthei khalhtute mawhphurhna a sang. Chuvangin lirtheia veivakte himna tur chuan a khalhtute an pawimawh," a ti.

iRAD project hi Mizoramah India ram hmun ṭhenkhat angin September 15, 2021 khan hman ṭan a ni a, nimin thleng khan Mizoram chhungah road accident case 17 iRAD app-ah ziah luh tawh a ni.