Robert Romawia'n a bialte lawmpuina hlan

Aizawl East-II bialtu MLA Robert Romawia chuan, nimin khan Dawrpui Multipurpose Centre-ah a bial chhunga HSLC leh HSSLC exam-a hlawh-tlinna changte leh fa nei tamte hnenah lawmpuina leh chawimawina thilpek a hlan.

Robert Romawia chuan zirlaite, nakin lawka ram leh khawtlang hruaitu la ni turte fuih phur nan leh zirna kawnga intlansiakna kawng dik an zawh theih nana insenso chu thil zawngchhangtlak nia a ngaih thu a sawi a, ṭhalai fa la nei zel turte chu fa neih tam hreh lo turin a chah.

Thusawitu dang Central YMA president Vanlalruata chuan sorkara dinhmun pawimawh chelh tura tuna zirlai mekte'n ṭan an lak ṭul a tih thu a sawi.

Inkhawmah hian Aizawl East-II huam chhunga HSLC leh HSSLC pass thar zawng zawngte hnena pek tur an veng ṭheuh YMA hruaitute hnenah hlan a nih bakah, pianphunga harsatna a neih avanga wheelchair aṭanga LLB pass R Vanrammawii, Armed Veng; HSLC-a 10 na Lalnunmawii, Tuithiang Veng, HSSLC science stream-a parukna Demetru Vanlalrelkima, Chhinga Veng leh commerce stream-a pariatna David R Lalhumhima hnenah laptop pek an ni.

Aizawl East-II huam chhung fa nei tam ber chawimawina dawngtu chu fa 15 nei Ngurauvi, Tuithiang Veng niin, Rs. 1,00,000 hlan a ni a, a dawttu hnenah Rs. 30,000 leh pathumna hnenah Rs. 20,000 hlan a nih bakah, fa pariat chin nei mi 12 hnenah Rs. 5,000 ṭheuh hlan an ni.

Inkhawmah hian NECS chairman Vanlalfelpuia Royte chuan CYMA hnenah a ṭul apianga an hman atan cheng nuai 15 a hlan nghal bawk a ni.