Inthlanna felfai buatsaih rualin Covid-19 laka him a ṭul - DEO

Kolasib district election officer (DEO) Dr H Lalthlangliana, bawrhsap chuan nimin khan Tuirial bial by-election inbuatsaihna kalpui dan chungchangah thuthar lakhawmtute a kawm a, inthlanna felfai buatsaih a nih rualin hripui laka vote thlaktute leh official-te an himna tur ruahmanna siam a ṭul thu a sawi.

Dr H Lalthlangliana chuan Tuirial bial by-election lo awm turah mi paliin inthlanna chuh tura hming an pek thu a sawi a, "A ṭul ang angte endik a ni tawh a,naktuk Nilaini chawhnu dar 3 thleng inhnuhdawhna hun hawn a ni," a ti a; hri lenlai a nih vangin political party hrang hrangte vote an zawnnaah SOP zawm chunga fimkhur taka an campaign a pawimawh tih a sawi.

Political party-te chu vantlang inkhawma mi awm thei zat ngai pawimawh tur leh house to house campaign-ah social distancing ngai pawimawh tura ngenin DEO chuan,"Vantlang inkhawm buatsaih a nih chuan MPF-te hriattir zel tur a ni a, vote thlak tawp hun aṭanga chhiar leta darkar 48 thleng campaign hun hawn ni ṭhin chu darkar 72 tih a nih tak avangin political party tinte tan campaign hun a tawi phah," a ti.

Dr H Lalthlangliana chuan inthlan ni-ah a vote thlak hun pangngai chu tlai dar 5 thlenga ruahman a nih thu te, tlai dar 5-6 inkar chu Sabbath serhte leh hri kai vote thlak duhte tan ruahman a nih thute leh, polling station tinah Covid-19 nodal officer dah vek a nih turte thu a sawi.