Champhaiah RT-PCR khawl hlan

UNICEF-in ICMR kaltlanga District Hospital, Champhai tana RT-PCR khawl a rawn pek chu nimin khan Champhai South bialtu MLA TJ Lalnuntluanga'n hospital hotute hnenah a hlan.

TJ Lalnuntluanga chuan Champhaia RT-PCR khawl bun a nih theihna tura Chief Minister leh Health Minister-te hmalaknaah lawmthu a sawi a, "Ram pum anga Covid-19 hrileng beihna kawnga NGO, kohhran leh khawtlang hruaitute'n sorkar an ṭawiawmna hi a lawmawm takzet," a ti a, a nihna tur ang taka RT-PCR khawl chu bun a nih theih nan lungrual taka hmalak tlan zel a ṭul dawn thu a sawi.

Minister hian RT-PCR khawl bun lailawkna tur atana ruat Eye Ward building-te, tuna TrueNat khawl bunna hmun leh hnathawh mekna hmun (RT-PCR khawl bun nghehna tura ruat) leh PM-CARES Fund aṭanga dawn PSA Oxygen Plant, Eye Ward building ground floor-a bun te a

tlawh nghal.

Sorkar thuchhuah tarlan danin, Mizoram sorkar hmalakna leh mamawhnate hriain ICMR/DHR chuan UNICEF kaltlangin testing centre-te tih changtlung nan a thlawna RT-PCR dah turin kum 2020 khan UNICEF ah rawtna a thlen a ni.