Sorkar laipui hnuaia hnathawhte thlirho

Sorkar laipui sum hmanga hmasawnna hnathawh programme hrang hrang enzuitu, District Development Co-ordination & Monitoring Committee (DDCMC/DISHA), Champhai chu nimin khan video conferencing kaltlangin an chairman C Lalrosanga, Lok Sabha MP leh co-chairman K Vanlalvena, Rajya Sabha MP hoin an ṭhu a, sorkar laipui scheme hrang hrang kalpui dan an thlirho.

Meeting-a tarlan a nih danin, MGNREGA hnuaiah sorkar kum 2021-2022 kal mekah September thleng khan job card holder 17,503-te hnenah ni 61 inhlawhna siam a ni.

April 2017 aṭanga kalpui ṭan PMAY-G (rural housing scheme) hnuaia beneficiary 165 hnenah in sak ṭanpuina pek a ni a, in 146 sak zawh tawh niin sak zawh loh in 19 a la awm. PMKSY pasarih kalpui zinga pahnih thawh zawh tawh niin pali chu tawpsan rih a ni a, pakhat thawh mek chu zawh fel a ni ṭep tawh.

JMM hmangin khaw pasarihah water supply scheme kalpui mek a ni. PWD hmalakna - PMGSY kawng 21 (km. 289.19 a thui) siam tur aṭangin kawng 16 (km. 229.17) zawhfel a ni tawh.

Kum 2016 aṭanga kalpui, PMKSY - ‘Har Khet Ko Pani’ tih scheme hmangin minor irrigation project panga kalpui mek a ni a, a vawi khatna turin ground water irrigation scheme kaltlangin lei hnuai verh hmanga tui lakna tur project pali kalpui a ni.

FOCUS kaltlangin project pali thawh mek a ni a, khaw pariatah sial vulhna tur in leh ṭul dangte siam zawh a ni. Vawk kah rai kalpui turin boar semen station sak a ni a, thawktute pawh lak an ni tawh.