ZMC-a nurse laknaah Minister leh MNF demna tur a awm lo a; Bye election nen chuktuah zawm luih chi a ni lo - MNF

MNF chuan nimin khan thuchhuah siamin, Zoram Medical College (ZMC) a thawk tur staff nurse lakna-ah Health Minister leh MNF demna tur a awm lo niin an tarlang a; Tuirial biala bye election awm tur nen sawi zawm chi a ni loh thu an chhuah.

Mizoramah Covid-19 kai kan pun mek lai leh mi tam takin nunna hlu tak an chan zawih zawih laiin, tunhnaiah ZMC-ah thawktu indaih loh avanga nurse 50 contract-in hmanhmawhthlak taka lak an nih chungchangah Health Minister leh Medical Operation Team Chairman-te chuan opposition party aṭangin dem an hlawh hle tih tarlangin MNF chuan, "MNF sorkar thlenga sawiselna thawm riva pawh a tam phah hle," an ti.

MNF chuan opposition party leh mi nawlpui aṭang pawhin hna lak dan kha a chinchhuaka hriat loh avangin sawisel tur lai an dap kilkhawr hlawm hle tih tarlangin, "Kan sawisel luih luih ni berin a lang a, Tuirial bial bye election lo awm tur nen chuktuah lui hramte pawh an lo awm," an ti a, indemna leh sawiselna tur zawng chawpin, a ni lo loin an chuktuah zawm lui ni berah an ngaih thu an sawi.

MNF tarlan danin, September 20, 2021 khan Health Minister kaihhruaina hnuaiah Chief Secretary, DPAR leh Finance department-te nen meeting neih a ni a, Covid-19 avanga thi kan pun zel avang leh thawktu indaih loh avangin mangan thilah hmanhmawh taka nurse 50 lak belhna tur remtih a ni. Hemi ni vek hian advertisement pawh chhuah nghalin, Chief Minister pawmpuina thlapa thutlukna siam a ni.

Nurse lak kha thil hmanhmawhthlak a nih avangin interview koh zung zung a nih theih nan interview board hmun nga-ah siam niin, board-ah hian Health Secretary-te, Director-te, nurse hna lam thiam (expert member) bakah DP&R aiawh an tel ṭheuh a ni.

Recruitment rules (RR)-in a phut angin hna diltute experience-te, computer certificate an neih leh neih loh bakah interview laia an performance aṭanga mark pein, a tiṭhate mark hmuh dan aṭangin fair taka merit list siam a ni a, 70% marks hmu chin chung lamho aṭangin a tlingte tlinga puan an ni.

ZMC-a Nurse volunteer-a thawk sa mi za tel awm mek thla khata Rs.22,000 lawmman la mek zingah mi 50 chauh lak thar turah volunteer mi 14-te lak an ni a, chu chu 28% an la tihna a ni. Mi 1,000 chuang hna diltu awmah za-a-za volunteer chauh lak bik chu phuin duhsakawm hle mah se, nurse hna zawng mek dangte pawh tiṭha tak tak an tam tho si nen, an dinhmun ngaihtuah tel ve tho a ngai a ni.

MNF chuan, "Tuna ZMC-a nurse an lak tharah khan ministry/party an inrawlh lo tih a chian em emna chu Health Minister leh MOT Chairman-te pawhin an bial chhung mi lak ni ve se tia duhsak an neih ngei a rinawm laiin, pakhat mah lak an ni lo," an ti.