India rama hripui vei hmuh thar tam lamah Mizoram pathumna

October 11, Thawh-ṭanni khan Mizoramah Covid-19 hri vei 1,430 hmuh chhuah a ni a; nimin zinga sorkar laipuiin India rama state hrang hrang Covid-19 dinhmun a tarlan danin, Mizoram chu India rama hri vei thar hmuh tam lamah pathumna a ni.

Nimin tlai dar 5 thleng khan Mizoramah Covid-19 vanga thi 363 an awm a, hripui vei dam tawh mi 956 chhuahtir an ni.

Covid-19 vei October 11-a hmuhte chu RAT hmanga hmuh 1,002, RT-PCR hmanga hmuh 321, TrueNAT hmanga hmuh 77 leh Fluorescent Immunoassay (FIA) hmanga hmuh 30 an ni.

IDSP record angin, Mizoramah Covid-19 vei 1,07,566 hmuh chhuah a ni tawh a, mipa 52,698 leh hmeichhia 54,868 an ni. Nimin tlai dar 5 thleng khan mi 93,781 (87.18%) chhuahtir an ni tawh a, mi 363 (0.33%) thi tawhin, enkawl mek mi 13,422 (12.47%) an awm.

Thawhṭannia hri vei hmuh chhuah 1,430 te hi mipa 646 leh hmeichhia 784 an ni a, an zinga mi 705 (49.30%) in symptoms an nei. Nimin khan tlai dar 5 thlengin hripui laka fihlim tawh mi 959 chhuahtir an ni a; Aizawl district-ah mi 602, Champhai district-ah mi 263, Serchhip district-ah mi 31, Lawngtlai district-ah mi 25, Mamit district-ah mi 22, Khawzawl district-ah mi 10, Saitual district-ah mi panga leh Lunglei district-ah mi pakhat an chhuak.

Mizorama Covid-19 vei hmuh tawh 1,07,566 chu mi 1,000 zelah hripui vei mi 98 an awm ang a ni a; mi 1,00,000 zelah Covid-19 vangin mi 33 an thi tawh ang a ni bawk.