NE state 8-a hri vei hmuh thar zinga 77.42% chu Mizorama hmuh a ni

Sorkar laipuiin nimin zinga a tarlan danin, Thawhṭanni khan hmarchhak state pariatah hripui vei 1,847 hmuh chhuah a ni a, heng zinga 1,430 (77.42%) chu Mizoram a hmuh chhuah a ni.

Thawhṭanni khan Assam-ah hri vei 270, Manipur-ah 105, Meghalaya-ah 64, Sikkim-ah 10, Arunachal Pradesh-ah 24, Nagaland-ah 24 leh Tripura-ah 10 hmuh chhuah a ni.

Hmarchhak state pariat zingah hri kai hmuh chhuah tawh aṭanga thihpui tawh percentage-ah Mizoram chu 0.34% niin a hniam ber; Arunachal Pradesh in dawtin 0.51%, Tripura 0.97%, Assam 0.98%, Sikkim 1.22%, Manipur 1.54%, Meghalaya 1.73% leh Nagaland 2.13% a ni.

Mizoram chu Thawhṭannia India rama hri vei hmuh chhuah tam lamah pathumna a ni a, Mizoram aia hmuh tamna te chu Kerala (6,996) leh Maharashtra (1,736) te an ni.

Hripui kai hmuh tawh aṭanga enkawl mek tam lamah Mizoram chu India rama sang ber a ni chhunzawm zel a, chutihrualin enkawl mek percentage hi a tlahniam ve zel. Pathianni zinga sorkar laipui report-ah Mizorama enkawl mek chu 14.77% a ni a, Thawhṭanni zingah 13.47% niin nimin zing khan 13.37% a ni tawh.