NLUP dawngtu thlan dan Sorkar laipuiah thlen a ni, min hêk chhe lo ang - Hawla

Mizorama eptu party-te chuan NLUP dawngtu tur thlang tura Congress MLA-te chauh tih an nih chungchang chu dan lo nia ngaiin, sorkar laipuiah an thlen. Hetih lai hian, Congress party president Lal Thanhawla chuan, eptu party-te'n an hêk chhiat theih loh tur thu a sawi.

MPCC President hian nimin khan Congress Bhavan-ah thu sawiin, NLUP hmangin Mizoramin hmasawnna kawng a zawh thu a sawi a, "Kan GSDP leh per capita ṭhannaah NLUP hian hmun pawi­mawh tak a luah. Hna kan thawh ṭhat avangin eng ang pawhin min hêkin min sawichhe ṭhin mah se, tute mahin an awih lo ang," a ti.

Hêk chhiat theih an nih loh thu sawiin Lal Thanhawla chuan, "Min hêk nasat poh leh sorkar laipuiin min zah tawlh tawlh ang," a ti a; Mizoramin sorkar ṭha tak a nei mek niin a sawi.

Chief Minister chuan, a kaih­hruai sorkar chu eirûkna chung­changah eptute'n puhna tur an hre lo nia sawiin, "Eirûknaa min puhna tur kan zawnpui zawk a ngai. Mizo Carbon an ti a, an duh ang ngeiin CBI kan ko lut a, ACB-te chhuina an ring tâwk a ni. Lottery an ti a, CBI chuan CAG lamin an tih tur an tifel tawhah an ngai," a ti.

Hetih lai hian, sorkar sum hmanga NLUP dawng tur thlang tura Congress kaihhruai sorkarin Congress MLA-te chauh an ti chu thil dik lo nia an hriat avangin eptu party pathumin Joint Resolution an siam a; Joint Resolution chu May 3, 2018 khan Mizoram BJP president Prof. JV Hluna'n sorkar laipui hotute hnenah a thehlut.

Prof. JV Hluna hian nimin khan a pisaah thuthar thehdarhtu ṭhenkhatte a kâwm a; Mizoram sorkar sum cheng nuai 400 hmanna tura Mizorama MLA 40 awm zinga ruling MLA 34-te chauh NLUP dawng tur thlang tura tih an ni chu Congress party campaign-na leh vote zawnna a nih thu leh, NLUP dawng tur thlan dan chu dan palzûtna a nih thu a sawi a ni.

Prof. JV Hluna sawi danin, an Joint Resolution hi Prime Minister zin vangin, PM Office-a Jitender Singh hnenah a pe a, resolution an siam chhan leh a nih dante a sawifiah nghal. Jitender Singh pawhin theihtawp chhuaha bawhzui a tum thu a lo hrilh. JV Hluna hian Union Home minister Rajnath Singh pawh a inah hmuin, resolution copy an pe a ni.

Prof. JV Hluna chuan, CADC-a BJP kaihhruai sorkar a piang chu Mizorama BJP tana rahbi pawimawh tak a ni a, central lama BJP hruaitute pawh an lawm hle niin a sawi a, "Tun kum tawpa Assembly election awm tur atan nasa takin kawngro a su dawn a ni," a ti.