Student Start-Up Movement sawiho

Nimin khan Governor Lt. Gen. Nirbhay Sharma hoin Raj Bhavan-ah Mizorama ‘Student Start-Up Movement’ bul ṭan dan tur sawiho a ni.

Governor chuan, sorkar hotute leh zir­na lama mithiamte thawk­hoin, Mizoram mamawhte chu chîk taka zir chian hmasak theih ni se ṭha a tih thu a sawi a, "Hma lam hun thui tak thlir tel chungin hmalak dan tur roadmap mumal tak duan ni se," a ti.

Meeting-ah hian chief secretary Arvind Ray, Higher & Technical Education secretary Ashish Kundar, Mizoram University, ICFAI University leh National Institute of Technology (NIT) Mizoram aiawhte an tel a; entrepreneur nih tumte’n harsatna hrang hrang an tawh ṭhin te, mithiamte kaihhruaina hnuaia training neih dan turte leh sumdawn bul ṭanna atana sum leh pai lama ṭanpuina awmte an sawiho.

Meeting hi All India Council for Technical Education (AICTE)-in Student Start-Up Movement chungchanga ngenna a siam bawhzuia neih a ni.