KHAWTHLIR
Thisen pe
Chaltlang Higher Secondary School NSS chuan nimin khan blood donation camp an huaihawt a, Aizawl Civil Hospital tan mipa 36 leh hmeichhia 12-in thisen unit 48 an pe. Chhingchhip Mualpui Branch KṬP pawhin nimin khan Serchhip District Hospital tan thisen unit 40 an pe a, a petute mipa 30 leh hmeichhia 10 an ni.
MZU-ah conference
Nimin khan Mizoram University-ah 4th. National Conference on Plant Growth Promoting Rhizobacteria (PGPR) for Sustainability of Agriculture and Environment ṭan a ni a, vawiinah chhunzawma zawh a ni ang. Conference-ah hian mi 120 an tel a, chu'ng zinga mi 90 chu India ram hmun hrang hrang aṭanga kal an ni.
HSLC result lawm
Zotlang High School, Aizawl chuan nimin khan an school hall-ah HSLC 2018 result ṭha an neih an lawm a, MLA Hmingdailova Khiangte-in a hmanpui. Zotlang H/S aṭang hian zirlai 38-in HSLC exam an hmachhawn a, mi 35 an pass. Hmingdailova Khiangte chuan zirlai hlawhtlingte hnenah lawmpuina thilpek a hlân a ni.
Free clinic buatsaih
National Institute of Locomotor Disability (NILD) - NERC, Dawrpui Vengthar MUP leh Mizoram University MSW department-a 4th. semester zirlaite ṭangkawp chuan nimin khan Dawrpui Vengthar West Presbyterian Kohhran hall-ah 'Identification and Assessment Camp for Elderly and PWD' an buatsaih. He hunah hian mi 53-te a thlawnin an hriselna dinhmun an endik a, mi 10 hnenah walking aid an pe a ni.
Chawimawina hlan
MZP sub-headquarters, Reiek chuan nimin khan Reiek Tourist Lodge-ah kumina Reiek khua aṭanga zirna lama mi chhuanawmte chawimawina hun an buatsaih a, minister KS Thanga'n a hmanpui. Reiek MZP hian mi hrang hrang hnenah chawimawina an hlan a ni.
Tuizem sem
AH&Vety department chuan nimin khan Siaha-a an pisaah NLUP third phase leh fourth phase hnuaia vawk vulh thlangtu chhungkaw 94 hnenah tuizem (Sintex) litre 300 dawng an sem.
Phalna nei loa zawrh khap
Lunglei DC chuan thupek chhuahin, Mizoram sorkarin phalna nei loa petrol, diesel leh khawnvartui zawrh a ngaimawh thu a tarlang a, "Mi tu mahin Lunglei district chhungah phalna nei loin petrol, diesel, khawnvartui, etc. an zuar tur a ni lo. Thupek bawhchhiate chu IPC Section 188 hmanga hrem theih a ni," a ti.
Tanpuina sem
RMSA bultumin nimin khan MADC Forest department conference hall-ah Children With Special Needs (CWSN) Beneficiary Distribution Grand Programme hman a ni a, Children With Special Needs te tan Book and Stationary Allowances Rs. 1,000 ṭheuh sem a ni. Hmeichhe naupang pual bik tan stipend Rs. 2,000 ṭheuh sem a ni bawk.