Translation Book Award 2017 hlân

Mizo Writers Association (MWA) chuan nimin khan Aizawl Press Club Annual Meeting an hmang a, minister Lalsawta'n a hmanpui. MWA hian Translation Book Award 2017 dawng tura thlan Lalzarzova Khiangte hnenah award an hlân.

Finance minister Lalsawta chuan, Mizote chu lehkha chhiar ngaina tak an ni a, chhiar tur erawh a ṭhahnem tâwk lo niin a sawi a, "Mizo ṭawng dik humhalh tur leh chawi lâr zel turin MWA ka ngen che u a, Mizo ṭawng leh Mizo subject tihhmasawn zelna turin sorkar pawhin theihtawp a chhuah dawn a ni," a ti.

MWA hian ṭawng danga lehkhabu ziah, Mizo ṭawnga lehlin, kum 2017 chhunga chhuak zingah Kenneth Anderson-a ziah, 'The Black Panther of Sivanipalli' chu an thlang a, a letlingtu Lalzarzova Khiangte hnenah Translation Book Award an hlan a ni. Lalzarzova Khiangte lehkhabu buatsaih, 'Mizo ṭawng grammer zirna' tih chu minister Lalsawta'n a tlangzarh bawk.

MWA Annual Meeting hi president R Vanlalrawna'n a kaihruai a, secretary R Lian­zuala'n report a pe. MWA hi kum 1977-a din a ni a, kum 2001 aṭangin Translation Book Award an pek ṭhin bakah, kum tin Mizo Proificiency Award leh HSLC, HSSLC, B.A leh M.A subject-a topper-te hnenah chawimawina an hlan ṭhin a ni.