NEDP hnuaia hmalakna tur sawiho

NEDP Core Committee chu May 10, Ningani khan chief minister Lal Thanhawla hoin Cabinet Room-ah an ṭhukhawm a; kum kal ta 2017-18 chhunga NEDP hnuaia hmalaknate an thlirho a, kum 2018-19 atana hmalakna tura ruahmannate an sawiho nghal.

Chief Minister chuan, NEDP chu sorkar flagship programme a nih angin, mipui zawng zawng, a bikin thingtlang lama chengte leh mi harsate tan hmasawnna thlentu a nih a, ram hmasawnna rualkhai leh chak zawk a thlen theih nan a kalpuitu department-te'n ṭha taka an kalpui a beisei thu a sawi a, "Hlawhtlinna chu beneficiary-te kutah awm mah se, anmahni kaihruaia kawng kawhhmuh turin sorkar hnathawk leh line department-te an pawimawh," a ti.

NEDP Core Committee meeting hian hmalakna thar pahnih a thuphungin a pawm. Pakhat chu Mizoram Business Infrastructure Establishment/ Development Scheme a ni a; sorkar emaw, mimal emaw ram âwl/hman ṭangkai loh awmte khawtlang mamawh atan motor parking emaw, ei tur leh chawhmeh zawrhna (modern food market) emaw sumdawnna hmun atana hman ṭangkai a nih theihna tur a ni.

Pakhat dang leh chu, 'My Project, My NEDP - Mipui mamawh inṭâwm ruahmanna (MiMIR)' tih a ni a; hemi hnuaiah hian Mizoram mipuite'n district tina khaw pakhat ṭheuh nasa taka a changkan theih nan hmasawnna (developmental) project, mamawh inṭâwm tur, eizawnna siam thei tur lam hawi an duan theih tura ruahmanna a ni.

Heng project pahnih atan hian cheng nuai 800 dah a ni a, district tinah project pakhat atan cheng nuai 100 ṭheuh hman tura ruahman a ni.