Mizoramah Covid-19 vei la hmu lo zel Sorkar hnathawkte an inkal chhâwk dawn

Novel coronavirus (Covid-19) laka invenna atana hma­lak­na kal zelah nimin thleng khan Mizoramah mi 47,805 enfiah (screen) an ni tawh a, Covid-19 vei hmuh a la ni lo. Hetih lai hian, General Administration department (GAD) chuan nimin khan office memorandum tichhuakin, mipui him zawk nan sorkar hnathawk group B, C leh D-te chu inkal chhâwk tur a nih thu a puang.

Sorkar thuchhuah tarlan danin, kumin February thla aṭang­in Lengpui Airport leh ramri hmun ṭhenkhatah zin hawte enfiah (screening) tih ṭan a ni a, chumi aṭanga nimin thlenga enfiah tawh mi 47,805 zinga mi 5,011 chu nimina enfiah an ni. Covid-19 vei rinhlelh vanga laboratory-a khâk endik (sample test) mi 10 awm tawh mah se, Covid-19 kai hmuh chhuah a la ni lo a; Covid-19 kai vanga khung hran pawh an la awm lo.

Mizoramah mahni ina khung hran mi 895 an awm tawh a, chu'ng zinga pahnih chu nimina khung hran ṭan a ni a; mahni in lama khung hran tawhte zinga 166 chu ram dang (India ram páwn) aṭanga hawte niin, mi dang 729 chu India ram chhung aṭanga hawte an ni.

Hetih lai hian, Mizoram sorkar chuan GAD kal­tlangin Mizo­ram sorkar hnathawkte inkal chhâwk tur a nih thu nimin khan a puang. GAD tarlan danin, sorkar hnathawk group B, C leh D-te chu office pakhatah ni khatah a zatve (50%) zel kalin, a zatve dang chu inah an awm ang a; chutiang tur chuan head of department/head of office-te'n ruahmanna an siam ang. Department/office tina hotu berte chu inkal chhâwk dan tur chawlhkar khat chhung atan zel siam tura tih an ni.

Sorkar hnathawkte chu pisa an kai loh ní-ah chuan inah an awm tur a ni a, pisa kai hun laiin telephone emaw, thil dang hmanga biak pawh theiha awm reng tura tih an nih bakah, a ṭul thuta office-a kal tura koh an nih hunah kal thei tura inrin reng a ngai bawk. Sorkar hnathawk inkal chhâwk hi April 4, 2020 thleng hman phawt tur a ni a; Power & Electricity, PHE, Supply, Health & Family Welfare, Excise & Narcotics, Fire & Emergency Services leh traffic leh dan leh thupek kengkawhtute erawh a huam lo.

Mizoram sorkar thuchhuah chuan, WHO tarlan danin, Covid-19 chu khawvel ram 182-ah a darh tawh tih a tarlang a, "Covid-19 darh zel tur ven a nih theih nan sorkarin mipui himna tura a thuchhuahte zâwm vek turin mipui ngen kan ni," a ti a; tih tur leh tih loh turte ngai pawimawha zâwm turin mi tin a chah a ni.

Mizoram dinhmun

• Enfiah tawh zat 47,805

• Sample thawn tawh zat 10

• Sample ho a la negative vek

• Mahni ina khung hran zat 895