Neitu thinlung pú Mizoramin a mamawh - Rev. Darchungnunga

Ṭangrual pawl, Zoram Peoples' Movement (ZPM) chuan nimin khan an pisaah inkhawm an nei a; thu sawitu Rev. Dar­chungnunga chuan, "Mizoramin a mamawh chu neitu thinlung pu tam hi a ni a, tualchhung rorelna chawi sân a, thuneihna sem zâi hi damdawi pawimawh tak a ni," a ti.

Rev. Darchungnunga chuan, ZPM-in chief ministerial candidate atana a thlan tâk Lalduhoma, ZNP president chu har­satna leh hrehawmna tam tak paltlang tawh a nih avangin retheihna laka Mizoram chhanchhuak turin a tling tâwka a rin thu a sawi a; "Zu phalrai vanga hmeithai leh fahrah lo pung ta te, zu phalrai hnua drugs hluar tate hi ZPM chuan ngawi rengin a en thei lo a ni," a ti bawk.

Thu sawitu dang Col. Lalramhluna chuan, "Pathian hriatpui indonaah hnehna chang turin tam lam hi tehfung a ni ngai lo. Mi rilru dik, Pathian rinchhan ngamte hnenah hnehna pek a ni ṭhin," a ti a; politics-a indona pawh Pathian kuta inhlan ngam tak zette chu Pathianin hnehna a pe mai dawn tih a sawi.

ZPM thuchhuan chuan, an pawlin CM can­didate atana an thlan Lalduhoma hoin chawlh­kar lo awm tur chhungin Kolasib district tuam an tum tih an tarlang.