Sorkarin zu siam a tum lo - Chief Minister

MNF party-te'n Mizoram sorkar zu siam chhuahna tur factory a siam mek nia an sawi chungchangah chief minister Lal Thanhawla chuan, Mizoram sorkarin zu siamna tur factory a siam loh thu a sawi.

Lal Thanhawla hian nimin khan Congress Bhavan-ah thu a sawi a, "Zu siamna tur an siam tih sawi a awm khan kan zawng a, kan hmu zo lo. CADC-in an huam chhunga zu siamna tur an siam hi an sawi chu a nih hmel. MLTP Act hman a nih lai pawh khan CADC area hi chu a huam ve lo a ni," a ti.

CADC sorkarin an huamchhunga hna a thawh danah state sorkarin thu a neih loh thu sawiin Lal Thanhawla, "An zu siamna tur an siam hi kan khap ngawt thei lo. Sum an hmang dik lo a nih chuan kan enpui thei," a ti a; ram hruai tumte chuan sorkar inrêlbâwl dan hre chiang se a duh thu a sawi.