Mipui Curfew zâwm vek turin Larsap-in mipui a sâwm

Governor PS Sreedharan Pillai chuan coronavirus (Covid-19) léng mek vanga chî-âi lo turin mipui a chah a, Prime Minister thupuan 'Mipui curfew' chu zâwm vek turin mi tin a sáwm. Larsap chuan, Prime Minister-in March 22, Pathianni zing dar 7 aṭanga zan dar 9 thleng 'Mipui Curfew' a puan chu zâwm vek tura mipui ngenin, "He hun chhung hian tumah in chhuahsan lo a, khawlaiahte kal lo a, vâk kual vel lo turin ka ngen a ni," a ti a; ṭan rual hun, harsatna thleng mek a huhoa do hun a nih thu a sawi.

Kohhran, tlawmngai pawl leh Pathian ringtute'n a ṭha zawngin thil tam tak an tih thu sawiin Governor chuan, "An thil ṭha tih hi chhunzawm zel turin ka fuih a ni. Mizo mipuite tana kan thawhna hi Pathian tana kan thawhna tho a ni. Mizoram him taka a awm zel theihna tur hi ka ṭawngṭaina a ni," a ti. PS Sreedharan Pillai chuan, Covid-19 avangin mipuite tan chî-âina tur a awm loh thu sawiin, "Kan invèn fimkhur erawh a ngai. Central leh state sorkar chuan mipui ni tin mamawhte an hmuh zel theihna atan hma a la zel a, mipui mamawh hi a awm zel ang," a ti a; Coronavirus do kawngah central sorkar leh state sorkar hmalakna ṭawiawm turin mi tin a sáwm a ni.