Berawlui quarry chima thi 4-te hmu kim ta

May 12, Inrinni zing dar 7:40-a Zemabawk dáia Berawluia quarry chimah mi paliin nunna an chân a, nimin Pathianni khan an ruang hmuh kim a ni.

Zemabawk Branch YMA President Lalram-sanga hnen aṭanga thu dawn danin, quarry neitu chu John S Halliday, Zemabawk Kâwnveng a ni a; a chim lai hian a hnuaiah tipper pahnihah lung hlân mek a ni.

Quarry chim hian mi pali - Linda Hming-thianghlimi (14) d/o Lalrinsanga, Zemabawk Bethel Veng; Lynda Zodinpuii (29) w/o Lalrunrema leh a fanu Eudi Lalremzovi (10), Zemabawk Bethel Veng leh, Munga (37) h/o Hmuni, Zemabawk Berawlui-te a delha hriat a ni. Tipper pahnih a delh bawk.

Quarry chim hriat a nih veleh Zemabawk leh a chhehvel mi tlawmngaite'n chhanchhuah hna an thawk nghal a, chawhma dar 10 velah sorkar lam aṭangin chhanchhuah hna thawktute an thleng ve bawk.

Sorkar lam aṭanga chhanchhuah hna thawktute chu State Di­sa­ster Response Force, National Disaster Res­ponse Force, 1st. MAP, 3rd. MAP leh 5th. IR-a Disaster Response team-te an ni.

Inrinni chhun dar 12:45-ah Linda Hming­thianghlimi ruang hmuh a ni a, tlai 3:40-ah Lalremzovi ruang hmuh leh a ni. Inrinni zanah pawh ruang zawng hna thawh a ni a, nimin zing dar 2:30 vel khan chawlh lailâwk zawk niin, zing dar 5-ah chhunzawm leh a ni.

Nimin chawhma dar 10:30 khan Lynda Zodinpuii ruang hmuh a ni a, nimin chhun dar 11:30 vel khan Munga ruang hmuh leh a ni bawk. Mitthite hi nimin khan vui an ni.

Quarry chimna hmun hi Inrinni khan Geo­logy & Mineral Resources minister H Ro­hluna, bialtu MLA R Lalrinawma, opposition leader MLA Vanlalzawma, MLA dang Lalruatkima, Dr K Beichhua leh Lalrinawma te, Aizawl Municipal Corporation-a hotu te, Aizawl District Disaster Management Authority chairman Dr A Muthamma ten an tlawh.

Nimin khan Home minister R Lalzirliana leh ruling MLA ṭhenkhatte'n an tlawh bawk.

Ruang zawngte thingpui lumna senso atan GMR minister H Rohluna'n Rs. 2,000, bialtu MLA R Lal­rinawma'n Rs. 5,000, MNF president Zoramthanga'n Rs. 2,000, MNF treasurer Vanlalzawma'n Rs. 1,000, AMC mayor PC Lalhmingthanga'n Rs. 10,000, ZPM general secretary K Sapdanga'n Rs. 5,000 an pek bakah, YMA branch ṭhenkhat leh pawl dang ṭhenkhatin pawisa an pe a; MLA Lalruatkima'n puan 10 a pe a ni.

Zemabawk YMA president Lalramsanga chuan, an huam chhunga chhiatna thlenga chhan-chhuah hna thawktu zawng zawng te, ṭanpuina thilpek petu zawng zawngte chungah an lawm tak zet tih a sawi.