Belgium Ambassador Aizawlah

Belgium ambassador Jan Luykx chuan Mizo­ram a rawn tlawh a, May 11, Zirtawpni tlai khan Governor Lt.Gen. Nirbhay Sharma nen Raj Bhavan-ah an inkâwm a, Mizoram dinhmun leh sorkar hmalakna hrang hrangte an sawi dun.

Governor chuan, Himalaya tlangrama chêng mipuite chu thingtlang aṭangin khawpui lamah eizawnna ṭha zawk zawngin an pêm lut zel tih sawiin, "Khawpuia hmanrua kan neihte'n min daih dawn loh avangin, urbanisation kawnga sûlsutu Belgium ram thiamna leh puihna kan mamawh," a ti a; Aizawl chu smart city-a siam turin traffic management leh mipui himna lama an tawnhriatte an ṭangkaipui theih a rin thu a sawi.

Jan Luykx chuan, Aizawl chu khawpui fai tak a nih thu leh khawpui lian taka awm ang maia inngaih thu a sawi a, "Mizoram hian tourism-ah theihna a neih ṭha hlein ka hria. Tun aiin hmasawnna ruhrel tihchangtlun theih se, khualzinte tlawh duh hmun pawimawh tak a nih thei a ni," a ti.

Jan Luykx hian May 11 khan chief secretary Arvind Ray chu a pisaah a kâwm a; tlaiah Planning secretary Dr C Vanlalramsanga nen a pisaah an inkâwm bawk.

Belgium Ambassador hi commercial counsellor pahnih Alexis Bossuyt leh Christophe Van Overstraeten-te' an rawn ṭawiawm a ni.