International Nurses Day hman a ni

May 12, Inrinni khan International Nurses Day a ni a, Mizoram hmun hrang hrangah hman a ni. Aizawlah chuan Synod Hospital auditorium-ah hman a ni a, Health minister Lal Thanzara'n a hmanpui.

Minister Lal Thanzara chuan, nurse-te chu Florence Nightingale anga hna thawk a, a inpek anga inpe thar turin a fuih a; damlo leh anmahni awmpuitu an chhungte chunga ṭawngkam hman leh biak danin nasa takin damloteah damna leh nat zualna a thlen thei a ni tih hre reng tura chahin, "Kan ṭawngkam leh cheziaah mi dang thlamuantu kan ni ngei ngei tur a ni," a ti.

Lal Thanzara chuan, Mizorama nursing school hrang hrangte chu an lâr a, Mizoram páwn aṭang pawhin an pan nasa ṭhin tih sawiin, "Phai lama inentir leh damlo tlawh cháng hian damdawi-ina Mizo nurse thawk an lo awm chuan a thlamuanthlak ṭhin. Nurse-te hi damlohna, natna, beidawnna leh thihna kara thawk reng in nih avangin rilru lam pawh a nghawng lo thei lo a, a êng zawnga thil thlir thiam a, rilru hrisel put tum hram hram tur a ni," a ti a; mahni inenkawl a, induat nachang hre turin a chah.

Health Minister chuan, Mizoramah doctor leh nurse indaih lohna a nasat thu sawiin, thingtlang hmun kilkhawra sub-centre-ahte nurse-te'n nasa taka ṭan an lakna chu lawmawm a tih thu a sawi a; MIMER din turah thawktu tur staff nurse 65 leh ward superintendent 31 lak a nih tawh thu leh, nikum khan GNM School, Thingdawl leh ANM School, Lawngtlaiah zirlai 20 ve vein bul an ṭan tawh thu a sawi bawk.

International Nurses Day hmanna hi Trained Nurses Association of India (TNAI), Mizoram Branch huaihawt a ni a, kumina Day thupui - 'Nurses: A voice to lead - Health is a human right' tih chu TNAI Mizoram Programme Committee chairperson C Thankhumi'n a sawi. Chawhnuah cultural show, quiz leh intihhlimna dangte hmangin hun an hmang.

International Nurses Day hi Florence Nightingale pian champha, May 12-ah hman ṭhin a ni.