Tuirini lei chim vangin harsatna tâwk ṭan
Sesawng leh Khawruhlian inkara Tuirini lei chim vanga Mizoram hmar lam tlangdung mipuiin harsatna an tawk ṭan mek a, harsatnain ziaawm lam a la pan hleithei lo. Lirthei kal kaina tur lei dawh a la ni lo a, mihring kal kaina tur lei (suspension bridge) siam theih hun tur pawh hriat a la ni lo.
Chalfilh Group YMA secretary Ngurthansanga sawi danin, Tuirini luia thîr lei siamna tura cheng nuai 13 a awm thu leh hna ṭan mai theih a nih thu, kumin March thlaa Assembly budget session-ah sawi lan ni mah se, May 12, Inrinni khan PWD engineer-te chuan suspension bridge estimate an la siam ngai loh thu an sawi a ni.
Ngurthansanga chuan, YMA chu pressure group an ni lo a, zâwldawh taka ngen mai chu an theih tâwk a ni tih a sawi rualin, Tuirini lei chim vanga an dinhmun chu a manganthlak hle tih a sawi a, "Engtia hma lak zel tur nge tih pawh hriatthiam a har tawh khawp mai," a ti.
Tun hnaia ruahsûrin Tuirini lui a tihlen avangin February 13, 2018-a lei chim ta hêlna tura motor kalna tur siam chu a chhiat tawh avangin motor kal kai theih a ni lo a; hei vang hian Darlawn leh a chhehvel khuaah bungraw lak luh a harsa tawh hle.
May 11, Zirtawpni aṭang khan Darlawnah chuan man to zawkin eirawngbawlna gas hralh a ni tawh. Gas phur motor lian tan Tuirini luiah kal kai ngam a nih loh avangin gas-te chu mihringin luiah an phur kai a, motor dangin Darlawn thlenpui a ni a; hei vang hian Sangi Gas Agency chuan V/C, YMA leh consumer pawlte phalnain man to zawkin gas an hralh a ni.
Darlawn V/C-te chuan an khuaa ni tin mamawh zuartute chu thil tito ngawt lo turin an hriattir a, mahse, tun ang renga motor lian a thlen theih loh a, inhlan chhawn zel a ngaih chuan an sumdawngte lak luhna man an ngaihtuah ve a ṭul tur thu V/C memberte chuan an sawi.
Hetih lai hian, tun dinhmunah chuan a man pangngai aia toa gas hralh a ni tih loh chu thil dang man a la to phah lo nia thu dawn a ni. Tuirini luiah motor a kal kai theih loh avang hian damlote pawh tlangvalte'n luiah an zawn kai mai nia thu dawn a ni bawk.