Minister-te'n hall leh parking siamna tur en

Inrinni zing khan Finance minister Lalsawta, UDPA minister Zodin­tluanga leh LAD minister PC Lalthanliana te chuan Thakthing Venga Local Administration Department (LAD) directorate awmna ṭhina market, multipurpose hall leh multi level parking siam dan tur an en a, khawtlang hruai­tute nen an inkâwm nghal.

Thakthing Zawlbuka inkawmhona chu Thakthing Coordination Committee chairman Lalrinawma'n a kaihruai a; Finance minister Lalsawta chuan, mimal leh pawl anga thil ti thei deuhte'n sorkar ram an nei leh ngawt ṭhin chu ṭha lo a tih thu sawiin, "Chutihrual chuan, mipui tana ṭha turah chuan sorkar chuan mipuite remchanna a ngaihtuah ber ṭhin," a ti.

Zodintluanga chuan, tute emaw tana building sak ngawt chu sorkar angin a theih loh thu sawiin, "A tira YMA enkawl tura tih ngawt chu a theih loh," a ti a; building sak zawh a nih hnuah erawh khawtlang enkawl tura dah theih a nih thu a sawi.

Thakthing Venga LAD rama market multi purpose hall leh multi level parking siamna tur atan hian UDPA chuan cheng vbc. 10 an ruahman a ni.