Online-a bill pek uar turin ngen

Power & Electricity department executive engineer Lalduhawma, Aizawl Power House chuan, tunlaia Covid-19 hri léng laka fimkhur nan mipuite chu online-a electric bill pek uar tura an duh thu a sawi.

Vanglaini palaiin a kawmnaah Lalduh­awma chuan, P&E department chu khâr ve mai theih a nih loh thu sawiin, "Mipuiin bill pekna counter an bâwr nasa ṭhin a, fimkhur thil thuah kan staff-te chu sanitizer, mask leh glove-te kan pe. Mahse, duh anga tam lei tur kan hmuh theih loh avangin a buaithlak deuh," a ti a; mi tam tak mask leh glove hmang loa office dawr leh bill pe an awm ṭhin avang­in fimkhur a ngaih leh zual thu a sawi. 

Aizawl Power House-a electric bill pekna counter-a ṭhute chuan, hun dang ang thoin bill pek tum mipui an tam thu an sawi a, "Mask, glove leh hand sanitizer-te duh ang kan nei si lo a, mi tam tak invenna nei loa bill rawn pe an tam bawk si," an ti a, bill pe tur leh office dawr turte chu office bathroom-a kut sil hmasa ṭhin tura hriattirna an tár tih sawiin, an hriattirna chu zawm turin an ngen.

Mipui dawngsawngtu ber an nih avang leh pawisa leh lehkha inpe tawn reng an nih avang­in Covid-19 léng palh ni se, a kai darh chakna tur zinga mi an nih thu an sawi a, "Kan him tlan zawk nan online-a bill pekna hrang hrangah pek vek theih a ni a, mipuiin kan hman ṭangkai a ngai," an ti.

Electric bill hi online-in bharatbill.pay.com-ah emaw mobile application hrang hrang BHIM, gpay, phonepe, paytm, amazon, mipay, etc. hmangin pek theih a ni. P&E department chuan bill pek theihna leh a pek dante chu mipuiin an hriatthiam theihna turin video clip an siam bawk.