KHAWTHLIR

Tui ren a ngai
Aizawl khawpui chawmtu, Greater Aizawl Water Supply Scheme (GAWSS) Phase-I leh Phase-II hmanga Tlawng lui aṭanga Dihmunzawla tui pump chhohna atana hman 33kV power line chu May 11, Zirtawpni tlai khan Tlawng lui bulah thing tluin a vaw chhia a, electric ban pathum a vaw tlu bawk. PHE department hotute chuan, electric line siamṭhaa tui pum leh thei tur chuan ni thum/li vel a ngaih dawn avangin, Aizawl mipuite chu tui renchem turin an ngen a ni.

Thisen pe
Chhinga Veng East Branch KṬP chuan an din champha vawi 17-na pualin Inrinni khan blood donation camp an huaihawt a, KṬP member mipa 29 leh hmeichhia pakuate'n Synod Hospital tan thisen unit 38 an pe.

Lok Adalat
Kolasib Lok Adalat chu Inrinni khan District Court-ah an ṭhu a, thubuai 33 ngaihtuah-in panga an chingfel. Thubuai an ngaihtuah zinga 23 chu leiba inṭhìnna a ni a, paruk chu ram buai chungchang a ni.

Mi 1,133 admit
April 2018 chhung khan Aizawl Civil Hospital-ah mi 30,504 an inentir a, mi 1,133 chu damdawi-inah admit an ni. April thla chhung khan damdawi-inah mi 61 an thi a, nau piang 326 an awm. Damlo 224 chu state pawna enkawl tura refer an ni.

Mawhphurtu ruat
Mizoram sorkar chuan, Allocation of Business-a ui seh (dog bites) chungchang leh a kaihhnawih thilah Local Administration Department (LAD) chu thingtlang lama mawhphurtuah a ruat a, khawpuia mawhphurtu atan Urban Development & Poverty Alleviation (UDPA) department a ruat bawk.