H Rohluna'n Edu-Options a hawng

Lynchpin leh Zalen chanchinbu ṭangkawpin an buatsaih, Edu-Options 2018 chu nimin khan Assembly Annexe basement-ah School Education minister H Rohluna'n a hawng.

Edu-Options hawnna in­khawm hi Zalen editor Vanlalrema Vantawl-in a kaihruai a; School Education Minister chuan, Edu-Options chu zirlaite'n an hun kal zel tur atan hlâwkna an hmuh phah ṭhin thu sawiin, "Tun ṭum pawh hi zirlai eng emaw zatin an hlâwkpui leh ngei ka beisei. Zirlai eng emaw zat an kal zel dan tur hre lo tam tak an awm a, chu'ngte tan chuan a ṭangkai hle a ni," a ti.

H Rohluna chuan, zirlaite hmakhua atan sorkarin theihtawp a chhuah thu sawiin, "Zirtirtute pawh zirlaibu ringawt zirtir lo a, zirlaite an hma lam huna kawng an zawn theihna tur lam hawi hrilh ṭhin turin kan chah a ni," a ti a; duh angin hlâwkna la hmu lo mah se, hma an sawn ve zel thu a sawi.

Edu-Options 2018-ah hian India ram hmun hrang hrang aṭangin zirna-in leh hna thawhna lam kawh hmuh thei sikul, college leh company eng emaw zatin dâwr an hawng a; vawiinah chhunzawm a ni ang.