KHAWTHLIR

Mizoram Merchants Association (MIMA) chuan dawrkaite leh an mi chhawrte chu kutkawr (glove) bun vek tur leh coronavirus laka invenna atana tih tur leh tih loh turte chu zâwm vek turin an chah. MIMA chuan, dawrkai zawng zawngte chu an bung­rua neih sate Covid-19 vangin a man pangngai aia tito lo turin an hriattir a, "Sumdawngte foreign leh state páwnah thu leh awm hma chu zin chhuah loh hrâm ni se. Sumdawngte leh an chhungte, state páwn aṭanga rawn haw leh lut reng reng ni 14 chhung páwnchhuak lo tura ngen kan ni," an ti.

Sialsûk Hotel Association chuan coronavirus laka invên nan March 23-29, 2020 chhung Sialsuka hotel zawng zawng khâr a ni dawn tih an puang a; khualzin, Sialsûka chaw ei ṭhinte chu lo hre lawk turin an chah. Aibawk khuaa hotel-te pawh nimin aṭang khan an khâr rih nia thu dawn a ni.

ZPM chuan thuchhuah siamin Covid-19 avanga Mizo zirlai leh hnathawk state pawn aṭanga lo hawte khauh taka ni 14 khung hran (quarantine) an nihlai a, financial year tawpa pawisa chinfel tuma lo lut phai lam mi Vaiten zalen takin Aizawlah office an dawr kual niin an hria a, heng state pawn lam mite hi ni 14 chhung quarantine an nih hma chu pawn chhuak bik lo turin an duh a, thuneitute bawhzui nghal turin an phût.

Indian Veterinary Association (IVA) chuan Covid-19 hrileng chung­changah thuchhuah siam­in arsa leh artui-in Covid-19 nen inkungkaih­na emaw inhnamhnawihna engmah an nei lo tih an tarlang a, "Covid-19 vei mihring taksa in natna a do let theih nan arsa leh artui ei chu thil ṭha a ni," an ti.

MNF chuan an party pisa Mizo Hnam Rûn chu March 31, 2020 thleng an khâr dawn tih an puang. MNF chuan, ram dang leh India ram state ṭhenkhata coronavirus léng laka invènna atana sorkar leh páwl hrang hrangte hmalakna mipuiin an thláwp ṭha chu lawmawm an tih thu an tarlang bawk. MUP pawhin Covid-19 vangin vawiin aṭangin March 31 thleng an pisa an khar dawn thu thuchhuah siamin an tarlang.