Health Minister Dr R Lalthangliana'n Covid-19 screening point-te a enfiah

Health & Family Welfare minister Dr R Lalthangliana chuan nimin khan Vairengte leh Barabi-a Covid-19 screening centre-te a tlawh a, hna an thawh dan a enfiah.

Health Minister hi Mizoram Youth Commission chairman Dr Vanlalṭanpuia, MLA leh National Health Mission (NHM) mission director Dr Eric Zomawia ten an ṭawiawm a; Vairengte damdawi-ina medical officer Dr C Lal­hmingmawii, police hotute leh YMA hruaitute'n an lo dawngsawng. Vairengteah screening centre-a duty-te hnenah thermal scanner leh hand sanitizer eng emaw zat a pe a, ei leh in senso atan Rs. 10,000 a pe bawk.

Dr R Lalthangliana chuan, Vairengte chu Mizoram mipui ei leh bâr leh mamawh hrang hrang luhna ber a nih avangin hmun dang aiin duty a hautak tih sawiin, duty-te inpekna chu lawmawm a tih thu a sawi a; eng chen nge an duty dawn tih hriat a ni lo tih sawiin, damdawi lama thawkte leh NGO-te chu inráwn zel turin a chah.

Screening centre-a thawktu indaih lohna chungchangah Mi­nister chuan, "Medical lam thiam pali nga vel daily-in lo la nghal u la, hlawh chu kan pe ang. Lirtheia indaih lohnaah pawh, motor hire tur lo la nghal u la, traffic management lam atan IR police 10 vel in mamawh ka lo sawi nghal ang," a ti a; ramria an thawhhona chu 

ṭha a tih thu a sawi.

Bairabi-a duty-te a tlawhnaah Health Minister chuan, "Tuna thawktu in indaih lohnaah hian Bairabi khuaa nurse emaw, health worker emaw ni khata Rs. 500 vel hlawh tur pahnih/khat chu NGO-te nen inráwn tlangin lo lak belh mai u la. Inthiarna leh tuizem in mamawhte pawh pek nghal in ni ang," a ti a; Covid-19 vei rinhlelhte endik hnuah an la fihlim vek avangin Pathian hnenah lawmthu sawi a ṭul thu a sawi. Bairabi-a duty-te hnenah thingpui inna senso atan Rs. 5,000 a pe a ni.