Sorkar kan ṭawiawm zel dawn - MPCC
Mizoram Pradesh Congress Committee (MPCC) Communication department chuan thuchhuah siamin, Coronavirus (Covid-19) laka Mizoram a him theihna tur leh invènna tura sorkar hmalakna reng reng theihtawp chhuaha an ṭawiawm zel dawn thu an tarlang.
Covid-19 laka him theihna turin All India Congress Committee (AICC)-in theihtawp chhuahin sorkar a thláwp tih sawiin MPCC chuan, February 12, 2020-ah AICC hotu Rahul Gandhi-a'n India sorkar chu uluk taka inpuahchah tura a ngen thu leh Congress president Sonia Gandhi-i'n March 6 khan Congress rorelna state chief minister-te theihtawpa hma la tura a ngen thu an sawi a, "MPCC pawhin Mizoram chhunga chengte kan him theih nan sorkar finchhuah tumin hma a la a, sorkar hmalakna sawisel loin, tih âwm tak sorkarin a tih lohte puangin hma kan la tawh a ni," a ti.
India ram chu Covid-19 vei leh vei lo enna (test) ratio-ah a hniam hle tih sawiin, "Keini state chu a test-na facility nei lo kan la ni leh zel a, hei vang hian fimkhur zual kan ngai hle," an ti a; sorkar thu zâwm hram hram turin mipui an ngen. Falkawna medical college chu thuam ṭha a, indah hranna hmun mumal zawk, ICU ṭha zawk leh containment zone-te siam turin sorkar an ngen bawk.
Congress party chuan, Covid-19 vangin Mizo mipui an rálkhèl hle tih sawiin, "Mipui hriat chin tur puan kawngah thu dik leh rintlak puang a, mipui an inpuahchah theihna tur hriattirna a rang lama pe turin sorkar kan ngen. Hripui laka awmze nei phaka inveng thei ramte chu langtlang taka hripui an hmachhawn dan puang ram an ni zel tih kan sorkar hian hria se kan duh," an ti.
MPCC chuan, MNF-in sorkar laipuia an thawhpui NDA sorkara prime minister Narendra Modi-a'n naktuk March 22-a public curfew a puan chu MNF sorkarin ṭha taka an thlàwp an rin thu an sawi a; Covid-19 laka Mizoram a him theihna tura thawka a hmatáwnga awm doctor, nurse leh health worker te, airport leh ramria police leh security duty-te leh tlawmngai pawlte chhuanawm an tih thu an sawi bawk.