Minister-in Khamrang Solar Plant hawng
Minister of state Lalruatkima chuan nimin zing khan Khamrang khaw châwmtu tur solar plant a hawng a; thu sawiin, Novel Coranavirus chungchangah thuthang belhchian dâwl lo léng vâk a tam tih sawiin, mipuite chu chî-âi loa sorkar thuchhuakte ngaihvena fimkhur turin a chah.
Lalruatkima chuan, ram leilung, thing leh mau tichhe lo zawnga hmasawnna kalpui a ṭul tawh tak zet tih sawiin, Khàmráng khawtlang hruaitute ṭhahnemngaihna vanga êng chhit tur hnianghnar zawk an nei thei chu lawmawm a tih thu a sawi.Rural Development minister chuan, RD department hmalakna hnuaia ni 100 inhlawhna kalpui mekah, sorkar laipuiin cheng vbc. 30 an rawn pek leh tawh thu leh cheng vbc. 40 dang pawh hmuh thuai an beisei thu a sawi a, "Ni khata an hlawh ṭhin cheng 211 pawh minimum wages mila kalpui turin ngen mek a ni a, thla thar lamah chuan tihhlawhtlin theih an beisei," a ti.
Khamrang Solar Plant hawn tâk hi 'MIMIR Project' hnuaia inelna siama Khamrang V/C-in pakhatna an dawn hmanga cheng nuai 100 sênga siam a ni a; a siam hna Agni Power & Electronics-in thawkin, wiring leh fitting chu Khelte Enterprise-in an thawk. Khamranga chhungkaw 212-te chuan LED bulb pahnih ṭheuh an chhi thei dawn a ni.