SHC sorkar lailâwka member turte June 2018 chhungin ruat tum a ni

17th May, 2018

Home minister R Lalzirliana chuan, Sinlung Hills Development Council (SHDC) sorkar term chu May 31, 2018-ah a tawp dawn avangin, Sinlung Hills Council (SHC) sorkar lailâwk (interim government) din leh member tur ruat chungchangah Mizoram sorkarin ruahmanna a siam thu leh June 2018 chhungin ruat a nih tur thu a sawi.

Nimina Saikot Field, Churachandpur-a HPC(D)-in Martyr's Day puala inkhawm an buatsaihah thu sawiin Home Minister chuan, tuna SHDC Chairman leh member-te term chu kumin May 31-ah a tawp tawh dawn avangin, Mizoram sorkar leh HPC(D)-te'n inremna an siam tawh leh SHC Bill (draft)-a tarlan angin, SHC election buatsaih a nih hmaa Mizoram sorkarin interim General Council member ruat chungchangah Mizoram sorkarin ruahmanna a siam dante a sawi a ni.

R Lalzirliana chuan, SHC Bill chungchang sawiin, May 2018 chhungin Law & Judicial department leh Finance department aṭangin concurrence hmuh hman beisei a nih thu leh tunah Law & Judicial-ah file kaltir mek a nih thu a sawi a, "May thla chhung ngeiin Draft SHC Bill hi Cabinet approval hmuh hman beisei a ni," a ti.

Minister R Lalzirliana chuan, SHC Bill chu Cabinet-in a pawm chuan, June 2018 chhungin Mizoram Legislative Assembly Special session koh a ni ang a, chutah chuan pass hman tum a nih thu a sawi bawk.

Home Minister sawi danin, SHC interim General Council member mi 14, Mizoram sorkarin a ruat turah sorkarin inremna a ziahpui tâk HPC(D) hruaitute'n an duh zawng mi ṭha mi 15 aia tlem lo hming leh address kimchang HPC(D)-ah an dil tawh a, HPC(D) pawhin sorkarah an thehlut tawh a; chu'ng mite chu Mizoram sorkarin a zir chiang ang a, mi ṭha leh rintlak turte mi 14 chu General Council member atan June 2018 chhungin ruat an ni ang.

Home department-in notification a tichhuak dawn a, notification tihchhuah aṭanga thla ruk chhungin interim arrangement anga kal a ni ang a, Mizoram Assembly inthlanpui hun puan dan azirin interim government hun chu pawhsei theih tura tih a ni.

Interim sorkara General Council member-te chuan SHC inthlan hma zawng chu a ṭul angin Mizoram sorkar nena inráwn chungin SHC Act-in a phût leh beisei angin hna an thawk dawn a ni.