Kum 2013-2018 chhungin HCS leh RSBY-ah cheng vbc. 120.43 hmang

Mizoram Government Nursing Association (MGNSA) chuan nimin khan Aizawl Civil Hospi­tal Con­ference Hall-ah Bien­nial General Confe­-rence vawi 20-na an hmang a; khuallian, Health minister Lal Thanzara chuan, kum 2013-2018 chhungin Health Care Scheme leh RSBY hnuaiah cheng vbc. 120.43 hman a nih tawh thu a sawi.

Health Minister chuan mipui hri­selna atana sorkar hmalak dante sawiin, kum 2013-2018 chhungin Health Care Scheme hnuaiah cheng vbc. 66.55 leh RSBY hnuai­ah cheng vbc. 53.88 hman a nih thu a sawi.

Lal Thanzara chuan, nurse hna chu mahni aia damlo leh enkawl ngaite dah hmasak ngaihna, chau leh beidawngte hnena thlamuanna, beiseina leh malsawmna thlen theitu a nih thu sawiin, "He hna zahawm tak hi in thawk ṭhin dawn ni a. Nurse indaih lohna nasa tak kara phunnawi loa damlote in enkawl ṭhin hi a lawmawm tak zet a ni," a ti a; Mizoram páwn hmun hrang hranga thawk Mizo nurse-te'n hmingṭha taka an thawk ṭhin chu lawmawm a tih thu a sawi.

Health Minister chuan, sorkar hnuaia thawk nurse-te chu sorkar hmél lanna leh darthlalang pawimawh tak an nih avangin, damlo dawnsawn kawngah hawihháwm taka damlote lo chhàwn zel turin a chah.

MGNSA conference-ah hian thupui chu 'Challenges for today's nurses' tih a ni a, thupui hi Mizoram College of Nursing-a lecturer Kapzawni'n a sawi.

Kum 2017-18 chhunga nurse pension-te hnenah thilpek an hlan a, an member thite an sûn bakah chawhnu lamah hruaitu thar an thlang.