Sikul naupangte'n Thingsai kawng an siam

Thingsai khuaa middle school leh a chung lam sikula zirlaite leh zirtirtute chu, nimin khan Thingsai khaw panna kawng siamṭhain an hnatlang. Hei vang hian nimin khan sikul an khâr.

Thu dawn danin, hnatlangah hian Thingsai khuaa sikul pathum - Saikuti Memorial M/S, Thingsai H/S leh Adhoc Aided Higher Secondary School-a zirtirtute leh zirlaite thawk chhuakin, an vaiin mi 200 vel an hnatlang a; kawng chhe zual laiah lung leh lei an phah a ni.

Thingsai khaw kawng hi a chhiat avangin kumina fûr lo thleng tur an huphurh a, chu­vang chuan Thingsai khuaa chhung­kuate chuan MGNREGS hmanga an inhlawhna pawisate an thawh khawm bakah, bialtu MLA John Siamkunga'n Rs. 50,000 a pek leh Thingsai khaw chhuak hmun hrang hranga mite'n sum an thawh khawm hmangin lung (boulder) eng emaw zat an lei.

Lung an lei hmang chuan May 14, Thawhṭanni khan khawtlang hnatlangin kawng chhe zual lai an lo thawm ṭha tawh a, an la zawh loh avangin nimin khan sikul naupangte an hnatlang leh a ni.

Thingsai kawng hi Tumtukâwn aṭangin km. 8 vel a ni a, BADP sum hmangin metre 700 vela thui chu lung phah a ni tawh. BADP sum hmang bawkin km. 1.7-a thui chu lung phah leh tura kalpui mek ni bawk. Chumi bak, km. 6 vel chu Thingsai mipuiin lung phah hna an thawk a, tun dinhmunah km. 1 chuang an phah tawh a, a theih ang anga hmalak chhunzawm zel an tum thu, thu dawnna chuan a sawi.

Thu dawnna chuan, Thingsai khua hi Mizorama khaw upa pawl, kum 130 chuang mei mit loa ding tawh a nih thu leh, tun thlenga metalled road an la neih loh vanga an harsatnate sorkar thuneitute hnena an thlen ṭhin pawhin awmzia a neih theih loh thu an tarlang bawk.