Hmar tlangdung harsatna sutkian nan Buhban-Khanpui kawng siam dawn

Chalfilh bialtu MLA Dr Ngurdingliana chuan, nimin khan a bial chhunga Buhban leh Khanpui inkar kawng siam tur tlawhin hna thawh dan tur a enfiah. MLA hi PWD hotute'n an ṭawiawm.

Dr Ngurdingliana chuan, Sesawng leh Khaw­ruhlian inkara Tuirini lei chim vangin ruahtui tam laiin hmar tlangdungte'n harsatna an tawh thu a sawi a, "Lei dawh zawh hmaa kal kaina tur by-pass road siam a ni a, kan thunun phak lohin beisei aiin ruahtui a tla hma a, zin veivâkte'n harsatna an tâwk ta a ni," a ti.

Beisei loh thil a thlena hmar tlangdungte'n har­satna nasa zawk an tawh lohna atan Buhban-Khan­pui kawng siamṭhatna atan sorkarin theihtawp a chhuah tih sawiin Dr Ngurdingliana chuan, "Kawng siamna atan hian sorkar chuan cheng nuai 72.25 min pe a, hemi hmang hian kan siam dawn a ni," a ti a; kawng siam zawh a nih chuan Tuirini lui lamah harsat­na awm mah se, hmar tlangdungte harsatna sutkian a nih tur thu a sawi.

Dr Ngurdingliana chuan, kawng siam hna thawktu turte chu kar leh aṭanga bul ṭan tur leh chawlhkar hnih/thum chhunga zawh ngei tum turin a chah a; hnathawh chu ngawrh taka vil a tum thu a sawi bawk.

Buhban-Khanpui kawng hi km. 14 vela thui a ni a, cheng nuai 72.35 hmangin kawng chhe zual lai, Buhban-Vanzau kawng km. 6 vel siam a ni ang.