KHAWTHLIR
HSSLC result
MBSE chuan vawiin chawhma dar 11:30 hian Higher Secondary School Leaving Certificate (HSSLC) Examination 2018 result a tichhuak dawn a; Chaltlanga MBSE pisa kawtah leh www.mbse.edu.in ah en theih a ni ang.
Vice President a lo zin dawn
India vice president Muppavarapu Venkaiah Naidu chu May 24, 2018 khian Mizoramah a rawn zin dawn. Vice President hian Mizoram University-a Academic & Seminar complex sak thar a hawng dawn a, MZU campus-a Boys & Girls Hostel sak tur lungphùm a phúm bawk ang.
Zu siamna tichhia
Excise & Narcotics department enforcement-te chuan nimin khan Rangvamual leh Phunchawng ramhnuai an enfiah leh a, zu siamna hmun 12 an tichhia. Rakzu litre 40, zu bilh lai ṭín 633, zu siamna bél 30 an man bawk. Excise & Narcotics-te hian kumin April aṭanga nimin thleng khan Rangvamual leh Phunchawng ramah hmun 50-ah zu siamna an tichhe tawh a; rakzu litre 430, zu bilhna ṭín 5,568 leh zu siamna bêl 215 an man tawh a ni.
CM Relief Fund
Mizoram Press Owner’s Association, Aizawl chuan mi harsa zualte ṭanpuina atan Chief Minister’s Relief Fund-ah Rs. 10,000 an chhûng lut.
Damdawi zuar
Nimin khan Ramhlun Indoor Stadium-ah Mizorama damdawi zuartute tan training buatsaih a ni a, vawiinah chhunzawm a ni ang. Damdawi zuartute chu an mawhphurhna te, damdawi dawr enkawl dan te, damdawi a nih dan tur taka zawrh leh hman dante leh, antibiotics resistance chungchang te, drug licence-in a huam chin chauh zuar tur leh dan anga dik taka hralh ṭhin tura zirtir an ni.